भिवंडीत हद्दपार गुन्हेगाराची तलवार नाचवत दहशत

हद्दपार गुन्हेगाराची तलवार नाचवत दहशत
भिवंडी, ता. २९ (वार्ताहर) : शहरात मागील काही दिवसांत हातात तलवार घेऊन दहशत पसरवण्याच्या घटना वाढीस लागल्या आहेत. दोन दिवसांपूर्वी अशीच घटना घडली होती. त्यातच आता गुन्हेगारी प्रवृत्तीमुळे हद्दपार केलेल्या आरोपीने शहरात येऊन पुन्हा तलवार घेऊन दहशत माजवण्याचा प्रकार घडला आहे. रमजान ऊर्फ बाबा चड्डी मुनिर शेख (वय ३०) असे ताब्यात घेतलेल्या आरोपीचे नाव आहे.
पोलिसांनी दिलेल्या माहितीनुसार नागाव गायत्रीनगर येथील झोपडपट्टीत राहणारा रमजान ऊर्फ बाबा चड्डी मुनिर शेख याला पोलिस उपायुक्त यांच्या आदेशाने ठाणे, पालघर, मुंबई शहर, मुंबई उपनगर व रायगड या जिल्ह्यांमधून दोन वर्षांच्या कालावधीसाठी हद्दपार केले होते. त्यानंतर मनाई आदेशाचा भंग करून सोमवारी (ता. २८) रात्री आठ वाजताच्या सुमारास रमजान ऊर्फ बाबा चड्डी हा आपल्या हातात तलवार घेऊन रस्त्याने येणाऱ्या-जाणाऱ्यांना तलवार दाखवून ‘यहाँ के हम भाई है। हम किसी को नहीं छोडेंगे, सबको काट देंगे’ असे बोलून दहशत निर्माण करीत होता. याप्रकरणी शांतीनगर पोलिस ठाण्यात गुन्हा दाखल करून त्यास ताब्यात घेण्यात आले आहे.