गोविंदवाडी रस्त्याची खड्ड्यांमुळे चाळण

गोविंदवाडी रस्त्याची खड्ड्यांमुळे चाळण
खड्ड्यांमुळे मोठ्या प्रमाणात वाहन कोंडी
सकाळ वृत्तसेवा
डोंबिवली, ता. २९ ः कल्याणमधील गोविंदवाडी बाह्यवळण रस्त्यावर जागोजागी खड्डे पडले असून, रस्त्याची अक्षरशः चाळण झाली आहे. या खड्ड्यामुळे वाहन कोंडीदेखील मोठ्या प्रमाणात होत आहे. त्यातच रस्त्याच्या कामासाठी येथील डावी मार्गिका खोदून ठेवली आहे. त्यामुळे वाहनचालक उलट्या दिशेने प्रवास करत आहेत. यामुळे एखादा अपघात होण्याची शक्यता नाकारता येत नाही.
डोंबिवली, शिळफाटा येथून भिवंडीकडे जाण्यासाठी आणि शिळफाटाकडे जाणारी वाहने गोविंदवाडी बाह्यवळण रस्त्याने धावतात. कल्याण शहरातील शिवाजी चौकातील वाहतूक कोंडी टाळण्यासाठी बहुतांशी वाहनचालक या बाह्यवळण रस्त्याला प्राधान्य देतात. त्यामुळे गोविंदवाडी बाह्यवळण हा सर्वाधिक वर्ळीचा रस्ता आहे. या रस्त्यावरून अवजड वाहनांची मोठ्या प्रमाणात वाहतूक असते. मागील महिन्यापासून गोविंदवाडी मार्गांवर मोठमोठे खड्डे पडले आहेत. या खड्ड्यात पावसाचे पाणी साचल्याने वाहनचालकांना खड्ड्यांचा अंदाज येत नाही. अशातच, वाहनचालक खड्डे चुकवण्याच्या प्रयत्न करत असतात. या वेळी अपघात होण्याची शक्यता नाकारता येत नाही. खड्ड्यांमुळे संथ गतीने वाहने धावत असल्याने या रस्त्यावर दररोज वाहतूक कोंडी होत आहे.

रस्त्याचे खोदकाम
पत्रीपूल ते दुर्गाडीकडे जाणारी एक मार्गिका बंद केली आहे. नवीन रस्त्याच्या कामामुळे हा मार्ग खोदण्यात आला आहे. त्यामुळे वाहनांना मध्येच उजवे वळण घेऊन दुर्गाडी किल्ला येथून प्रवेश करावा लागतो. या मार्गिकेतून वाहने धावत असल्याने या रस्यावर दुर्गाडी किल्ल्यापर्यंत कोंडी होत आहे. यामुळे नागरिकांना नाहक मनस्तापाला सामोरे जावे लागते.

अदृश्य सळईने दुर्घटनेचा धोका
वाहनचालकाला खड्डा दिसावा म्हणून काहींनी लोखंडी सळई खड्ड्यात पुरून ठेवली आहे. या सळईचे एक टोक रस्त्याच्या दिशेने आले आहे. रात्रीच्या वेळेत सुसाट असलेल्या वाहनांना ही सळई न दिसल्यास मोठी दुर्घटना होण्याची शक्यता आहे.