केडीएमसीच्या खंबाळपाडा डेपोबाहेर कंत्राटी कामगारांचे आंदोलन

केडीएमसीच्या खंबाळपाडा डेपोबाहेर कंत्राटी कामगारांचे आंदोलन
कंत्राटी कामगारांना कामावर घेण्यासाठी १५ ऑगस्टची डेडलाइन
सकाळ वृत्तसेवा
डोंबिवली, ता. २९ ः कल्याण-डोंबिवली पालिकेत काम करणाऱ्या कंत्राटी कामगारांच्या वतीने मंगळवारी (ता. २९) विविध मागण्यांसाठी खंबाळपाडा डेपोबाहेर काम बंद आंदोलन करण्यात आले. स्वच्छतेच्या नवीन कंत्राटदाराकडून कामावर घेण्यासह पूर्वीच्या कंत्राटदाराकडून थकलेला पगार मिळण्याच्या प्रमुख मागण्यांसाठी हे आंदोलन केले गेले. येत्या १५ ऑगस्टपर्यंत कर्मचाऱ्यांना कामावर घेण्याचे आश्वासन केडीएमसी प्रशासनाकडून कामगारांना देण्यात आले. यानंतर हे आंदोलन स्थगित करण्यात आले.
कल्याण-डोंबिवली महानगरपालिका क्षेत्रात यापूर्वी काम करणाऱ्या सेक्युअर एक कंपनीच्या कंत्राटी कामगारांकडून स्वच्छता आणि कचरा संकलनाचे काम केले जायचे, मात्र केडीएमसी प्रशासनाने आता महानगरपालिकेच्या सात प्रभागांमधील कचरा संकलन आणि वाहतुकीचे काम सुमीत एल्कोप्लास्ट या खासगी संस्थेला दिले आहे. त्यामुळे या नव्या संस्थेमध्ये कामावर घेण्याची मागणी या कामगारांकडून गेल्या काही महिन्यांपासून सातत्याने केली जात आहे, मात्र त्याला अद्याप मुहूर्त सापडत नसल्याचे सांगत या कामगारांनी खंबाळपाडा वाहन डेपोबाहेर सकाळी ६ वाजल्यापासून काम बंद आंदोलन केले. यामुळे या ठिकाणी असलेल्या कचरागाड्या बाहेर पडू न शकल्याने कल्याण पूर्व आणि आसपासच्या परिसरातील कचरा संकलनाच्या कामावर काही काळ परिणाम झाला होता.
दरम्यान, शिवसेना उद्धव बाळासाहेब ठाकरे पक्षाचे जिल्हाप्रमुख दीपेश म्हात्रे यांनी आंदोलनस्थळी भेट देत केडीएमसी अधिकारी आणि कंपनी व्यवस्थापनाच्या प्रमुख अधिकाऱ्यांशी चर्चा केली. यामध्ये येत्या १५ ऑगस्टपर्यंत उर्वरित जागांवर या कर्मचाऱ्यांना घेण्याची कार्यवाही पूर्ण करणार, एकाही कर्मचाऱ्याला कामावर घेण्यासाठी पैशाची मागणी होत असेल त्यावर कायदेशीर कारवाई करणार आणि पूर्वीच्या कंत्राटदाराकडून थकलेला पगार लवकरात लवकर देण्याची कार्यवाही करणार, अशा प्रमुख मुद्द्यांवर उपायुक्त प्रसाद बोरकर यांनी सकारात्मक प्रतिसाद दिला. यानंतर हे आंदोलन तातडीने थांबवण्यात आले आणि केडीएमसीच्या कचरा संकलन गाड्या डेपोतून बाहेर पडल्या.