सप्टेंबर अखेरपर्यंत सॅटीस- २ सेवेत

सप्टेंबरअखेरपर्यंत सॅटिस २ सेवेत
ठाणे पूर्वतील कोंडी फुटणार
सकाळ वृत्तसेवा
ठाणे, ता. २९ : स्मार्ट सिटीअंतर्गत ठाणे पूर्व येथे उभारण्यात येत असलेल्या सॅटिस २ प्रकल्पाच्या कामाला गती आली आहे. मध्ये रेल्वेने पुलाचे गर्डर टाकण्यासाठी १४ तासांचा मेगाब्लॉक दिला आहे. त्यामुळे पाच गर्डर टाकण्याचे काम पूर्ण होताच त्यावर स्टील काँक्रीटीकरण करून हा पूल एकमेकांना जोडत एलिव्हेटेड करण्यात येणार आहे. त्यामुळे सप्टेंबरअखेरपर्यंत सॅटिस २चे काम पूर्ण होईल, असे संबंधित अधिकाऱ्यांनी सांगितल्याची माहिती माजी खासदार राजन विचारे यांनी दिली.

सॅटिस २ या प्रकल्पातील कोपरी रेल्वेपुलावरील गर्डर टाकण्याचे काम गेले दोन दिवस सुरू आहे. विचारे यांनी सोमवारी (ता. २८) ठाणे महापालिकेचे अधिकारी, रेल्वे प्रशासनाचे अधिकारी यांच्यासोबत पाहणी दौरा आयोजित करून या गर्डरचे काम कितपत पूर्ण झाले आहे, याची माहिती घेतली. या प्रकल्पाविषयी माहिती देताना विचारे यांनी सांगितले, की या मार्गावर ५९ खांब उभे केले; परंतु गेल्या वर्षभरापासून ब्लॉक घेण्यासाठी रेल्वेकडे पाठपुरावा नसल्याने गर्डर टाकण्यास विलंब लागला होता.

आता ४.५० मीटरचे पाच गर्डर असून हे गर्डर टाकले आहेत. त्यावर स्टील काँक्रीट करून हा पूल एकमेकांना जोडून २.२४ किलोमीटर लांबीचा एलिव्हेटेड मार्ग तयार होणार आहे. त्यामुळे ठाणे पूर्व स्टेशन परिसरात होणारी वाहतूक कोंडी लवकरच सुटणार आहे. हा प्रकल्प सप्टेंबरअखेरपर्यंत पूर्ण करून देण्याचे आश्वासन शिवसेना नेते राजन विचारे यांना अधिकाऱ्यांनी दिले आहे. त्यामुळे सप्टेंबरनंतर ठाणे पूर्व येथील कोपरी परिसरातील कोंडी फुटून वाहतूक वेगवान होण्याची अपेक्षा व्यक्त केली जात आहे.

प्रकल्पाची थोडक्यात माहिती
सॅटिस २ प्रकल्पाला २०१८ला मंजुरी मिळाली होती. त्यानंतर या प्रकल्पाला स्मार्ट सिटीअंतर्गत समावेश करून घेण्यासाठी केंद्र सरकारकडे व तत्कालीन महापालिका आयुक्त संजीव जयस्वाल यांच्याकडे पाठपुरावा केला. २६१ कोटी व रेल्वेपुलासाठी ३९ कोटी अशी एकूण २९८ कोटींना मान्यता मिळाली. दिल्लीच्या आयआरडीसी विभागाकडूनही मंजुरी मिळवून घेतली. १९ फेब्रुवारी २०२२ रोजी सॅटिस डेकचे भूमिपूजन करण्यात आले. या प्रकल्पाचे काम टप्प्याटप्प्यामध्ये सुरू झाले.

टक्केवारीत प्रकल्प रखडले
नवीन ठाणे स्थानक, सॅटिस पूर्व प्रकल्प यांसारखे अनेक ठाण्यांतील प्रकल्प टक्केवारीच्या नादात रखडले आहेत. या प्रकल्पांना चालना देण्यात सत्ताधारी सपशेल अपयशी झाले असल्याचा आरोप शिवसेना नेते माजी खासदार राजन विचारे यांनी केला आहे. दरम्यान, सॅटिसचे काम सुरू असतानाही सत्तेत असणाऱ्या कोणत्याही लोकप्रतिनिधींनी या ठिकाणी येऊन आढावा घेतला नाही आणि साधी पाहणीदेखील केली नसल्याने विचारे यांनी खंत व्यक्त केली.