कळंबोलीतील तलावांची स्वच्छता मोहीम

कळंबोलीतील तलावांची स्वच्छता मोहीम
नवीन पनवेल, ता. २९ (बातमीदार) ः पावसाळ्याच्या पार्श्वभूमीवर व डेंगी, मलेरिया यांसारख्या जलजन्य रोगांचा प्रादुर्भाव रोखण्यासाठी पनवेल महापालिकेने ‘स्वच्छता अपनाओ – बिमारी भगाओ’ या विशेष मोहिमेअंतर्गत कळंबोली प्रभागातील तलाव व परिसरात स्वच्छता अभियान राबवले. तलावांच्या परिसरात साफसफाईसह, दूषित पाण्याचा साठा कमी करण्यासाठी पालिकेने पावले उचलली आहेत.
या मोहिमेअंतर्गत सफाई निरीक्षक हरेश कांबळे यांच्या नेतृत्वाखाली स्वच्छता कर्मचाऱ्यांच्या पथकाने कळंबोली प्रभागातील प्रमुख तलाव व आजूबाजूचा परिसर स्वच्छ केला. नागरिकांशी संवाद साधून स्वच्छतेचे महत्त्व, पाणी साचू न देण्याचे नियम, व त्या अनुषंगाने खबरदारीचे उपाय सांगण्यात आले. पाणथळ जागांमुळे डेंगी, मलेरियासारख्या आजारांची वाढ होते, याबाबत जनजागृतीही करण्यात आली. महापालिकेचे आयुक्त मंगेश चितळे यांच्या मार्गदर्शनाखाली संपूर्ण शहरभर १ ते ३१ जुलै दरम्यान ही विशेष स्वच्छता मोहीम राबवली जात आहे. या काळात सार्वजनिक शौचालये, तलाव, नाल्यांची सफाई, कीटकनाशक फवारणी, जनजागृतीपर कार्यक्रम आदी उपक्रम राबवले जात आहेत. उपायुक्त वैभव विधाते यांनी सांगितले, स्वच्छता अंगीकारूया, आजारपण पळवूया" या घोषवाक्याअंतर्गत नागरिकांनीही स्वच्छता मोहिमेत सक्रिय सहभाग घ्यावा, ही जबाबदारी केवळ प्रशासनाची नसून सर्वांची आहे, असे आवाहन त्यांनी केले.