सत्ताधाऱ्यांचे पाण्यासाठी आंदोलन

सत्ताधाऱ्यांचे पाण्यासाठी आंदोलन
सामान्य जनता वेठीस, संतप्त नागरिकांचा सवाल
सकाळ वृत्तसेवा
डोंबिवली, ता. २९ ः कल्याण पूर्वेतील बहुतांश भागात कमी दाबाने पाणीपुरवठा होत असल्याच्या निषेधार्थ भाजपच्या वतीने मंगळवारी (ता. २९) तब्बल दीड तास रास्ता रोको आंदोलन करण्यात आले. याचा फटका नोकरदार, शाळकरी मुले, रुग्णवाहिका, ज्येष्ठ नागरिक, वाहनचालकांना बसला. सामान्य नागरिकांना वेठीस धरणे कितपत योग्य आहे, असा संतप्त सवाल नागरिकांनी केला.
कल्याण-पुना लिंक रोडवर आंदोलनकर्त्यांनी ठिय्या मांडला होता. यामुळे मोठ्या प्रमाणात वाहतूक कोंडी निर्माण होऊन रस्त्यावर वाहनांच्या लांबच लांब रांगा लागल्या होत्या. तब्बल दीड तास रास्ता रोको केल्याने यात शालेय विद्यार्थी, शिक्षक यांची वाहने अडकून पडली होती. सामान्य नागरिक आणि विद्यार्थ्यांना यामुळे मोठा मनस्ताप होऊन त्यांना कामावर लेट मार्क लागल्याने नागरिकांनी सत्ताधारी पक्षाच्या नावाने बोटे मोडून संताप व्यक्त केला. रुग्णवाहिकादेखील अडकून पडली, मात्र नंतर आंदोलनकर्त्यांनी बाजूला होत रुग्णवाहिकेला रस्ता करून दिला.

याबाबत डोंबिवलीतील मॉडेल कॉलेजच्या प्राध्यापिका पूनम फडतरे यांनी सांगितले की, मी एका महाविद्यालयात प्राध्यापिका आहे. माझे साडेबारा वाजताचे पंचिंग आहे. या सगळ्या गोंधळामुळे मी कॉलेजला कधी जायचं हे मला सांगा आणि मला लेटमार्क मिळाला, तर याला जबाबदार कोण? हे आंदोलनकर्ते जबाबदारी घेणार आहेत का, असा संतप्त सवाल त्यांनी उपस्थित केला. तुम्ही नेहमी सर्वसामान्य नागरिकांना रस्ता अडवून वेटीस का धरता? हा रस्ता अडवल्यामुळे या मार्गावरून जाणाऱ्या नागरिकांना खूप मोठ्या अडचणींना सामोरे जावे लागत आहे. आता यामध्ये ॲम्बुलन्सदेखील अडकलेली आहे. तुम्हाला आंदोलन करायचे आहे, तर तुम्ही वेळ आणि काळ बघून आंदोलन करावे, असेदेखील फडतरेंनी उद्विग्न होऊन सांगितले.