बाजार समितीला खड्ड्यांचे ग्रहण......

बाजार समितीला खड्ड्यांचे ग्रहण
खड्ड्यांच्या रस्त्यातून मार्ग काढताना अवजड वाहनांच्या चालकांची मोठी कसरत
तुर्भे, ता. २९ (बातमीदार) ः मुंबई कृषी उत्पन्न बाजार समितीमधील अंतर्गत रस्त्यांची अत्यंत दयनीय अवस्था झाली असून खड्ड्यांचे ग्रहण लागले आहे. त्यात धान्य बाजार, मसाला बाजाराबरोबर कांदा-बटाटा बाजारात रस्त्यांची चाळण झाली आहे. या उखडलेल्या, खड्ड्यांच्या रस्त्यातून मार्ग काढताना अवजड वाहनांच्या चालकांना मोठी कसरत करावी लागत आहे.
विशेष म्हणजे, मसाला आणि अन्नधान्य बाजाराच्या रस्त्यांच्या डांबरीकरणावर या वेळी २५ कोटी रुपये खर्च करण्यात आले आहेत. तरीही रस्ते खड्ड्यात गेले असून बाजारात पावसाचे पाणी तुंबण्याचे प्रकार होत आहेत. याबाबत बाजार घटकांनी तीव्र नाराजी व्यक्त केली आहे. बाजारात माल घेऊन येणाऱ्या वाहनांना खड्ड्यांमुळे अडचण होत आहे.
बाजारात दररोज शेकडो वाहने ये-जा करीत असतात. या एका वाहनात सरासरी २० ते २५ किंवा ३० टन माल असतो. अशा मालाने भरलेल्या अवजड गाड्या खड्ड्यांतून कशाबशा मार्ग काढतात; मात्र खड्ड्यांमुळे मालाच्या गाड्या खड्ड्यांत आदळतात आणि त्यामुळे गाड्यांचे नुकसान होत आहे. तसेच वाहतुकीचा वेग मंदावत आहे. मसाला बाजारात पाणी तुंबण्याची परंपरा कायम राहिली आहे. मसाला बाजारात पावसाचे पाणी जाण्यासाठी मार्गच नसल्याने पाणी तुंबते.

प्रशासनाचा कानाडोळा
मसाला आणि धान्य या दोन्ही बाजारांत गटारे तुंबली असून यामुळे व्यापारी, कामगार, ग्राहक त्रस्त झाले आहेत. गाळ्यांच्या भोवताली तळे साचत आहे; मात्र प्रशासनाला त्याचे काहीही सोयरसुतक नाही. बाजार आवारातील खड्डे, साचलेले पाणी आणि दुर्गंधीकडे प्रशासनाचा कानाडोळा झालेला पाहायला मिळत आहे.

डांबरीकरणावर तब्बल २५ कोटींचा खर्च
संचालक मंडळाच्या पाच वर्षांच्या कार्यकाळात धान्य व मसाला मार्केटमध्ये रस्ते डांबरीकरणावर तब्बल २५ कोटी रुपये खर्च करण्यात आले. तरीही खड्डे मात्र दिसत आहेत. यासंदर्भात बाजार समिती सचिव पी. एल. खंडागळे यांची प्रतिक्रिया घेण्याचा प्रयत्न केला असता त्यांच्याकडून प्रतिसाद मिळाला नाही.

पेव्हर ब्लॉकचा उतारा
कांदा-बटाटा बाजारात मागच्या १५ वर्षांत एकदाही पूर्ण रस्त्यांचे डांबरीकरण करण्यात आलेले नाही. रस्त्याची दुरवस्था झाली की तात्पुरती डागडुजी केली जाते. खड्ड्यात पेव्हर ब्लॉक टाकले जातात. ब्लॉकमुळे टायरचे नुकसान होत असल्याचे वाहनचालकांकडून सांगितले जाते.