वंचितांना शासकीय योजनांचा लाभ प्राधान्याने द्यावा

वंचितांना शासकीय योजनांचा लाभ प्राधान्याने द्यावा
अनुसूचित जाती-जमातीचे आयोगाचे अध्यक्ष आनंदराव अडसूळ यांचे निर्देश

पालघर, ता. २९ (बातमीदार) : जिल्ह्यातील अनुसूचित जाती-जमातीच्या नागरिकांसाठी शासन राबवत असलेल्या विविध योजनांचा लाभ प्राधान्याने देण्यात यावा, या योजनांच्या लाभापासून एकही घटक वंचित राहणार नाही, तसेच याबाबत आयोगाकडे कोणत्याही प्रकारची तक्रार येणार नाही, याची दक्षता घ्यावी, असे निर्देश राज्य अनुसूचित जाती-जमाती आयोगाचे अध्यक्ष आनंदराव अडसूळ यांनी मंगळवारी (ता. २९) प्रशासनाला दिले.
अनुसूचित जाती-जमाती आयोगाचे अध्यक्ष आनंदराव अडसूळ यांच्या अध्यक्षतेखाली अनुसूचित जाती-जमातीच्या राबविण्यात येणाऱ्या विविध योजनांचा आढावा आज जिल्हाधिकारी कार्यालयातील बैठकीत घेण्यात आला. या वेळी आयोगाच्या सदस्य वैदेही वाढाण, जिल्हाधिकारी डॉ. इंदुराणी जाखड, जिल्हा पोलिस अधीक्षक यतिष देशमुख, जिल्हा परिषदेचे मुख्य कार्यकारी अधिकारी मनोज रानडे, अपर जिल्हाधिकारी भाऊसाहेब फटांगरे, जिल्हा शल्यचिकित्सक डॉ. रामदास मराड, निवासी उपजिल्हाधिकारी सुभाष भागडे, तसेच संबंधित अधिकारी उपस्थित होते. या वेळी अडसूळ म्हणाले, की अनुसूचित जाती-जमाती समाजाच्या मागण्यांच्या अनुषंगाने या समाजाच्या सध्याच्या सामाजिक, शैक्षणिक, आर्थिक, सांस्कृतिक आदी योजनांचा संबंधितांना लाभ देण्यात यावा, पालघर जिल्हा हा आदिवासीबहुल जिल्हा असल्याने या जिल्ह्यातील अनुसूचित जाती-जमातीचा एकही घटक वंचित राहणार नाही. तसेच समाजकल्याण व आदिवासी विकास विभागाकडील जातवैधता प्रमाणपत्राचा तातडीने निपटारा करावा, जेणेकरून एकही विद्यार्थी शिक्षण व शासकीय लाभापासून वंचित राहणार नाही, याकडे प्रशासनाने लक्ष द्यावे. प्रामुख्याने आरोग्य, शिक्षण याकडे प्रामुख्याने लक्ष द्यावे, अशा सूचना या वेळी त्यांनी दिल्या.

विविध योजनांचा आढावा
समाजकल्याण विभागाच्या अंतर्गत असणाऱ्या मुला-मुलींचे वसतिगृह तसेच विविध योजना, वनविभागामार्फत वाटप करण्यात येणारे वनपट्टे, आदिवासी विभागामार्फत विद्यार्थ्यांना पुरविण्यात येणाऱ्या सोयीसुविधा, विविध दाखले, तसेच इतर विभागांमार्फत राबविण्यात येणाऱ्या योजनांबाबत अनुसूचित जाती-जमाती आयोगाचे अध्यक्ष आनंदराव अडसूळ यांनी आढावा घेतला.