खिंडीपाडा पालिका शाळेच्या दुरुस्तीची प्रतीक्षा

खिंडीपाडा शाळेच्या
दुरुस्तीची प्रतीक्षा
‘ना-हरकत’साठी उपजिल्‍हाधिकाऱ्यांना पत्र
सकाळ वृत्तसेवा
मुंबई, ता. २९ ः खिंडीपाडा येथील महापालिका शाळेच्या इमारतीची तातडीने दुरुस्ती सुरू करण्याचे काम शिक्षण विभागातर्फे सुरू आहे; मात्र त्यासाठी ना-हरकत प्रमाणपत्र लवकर मिळण्यासाठी भांडुप येथील ‘एस’ विभागातील अधिकाऱ्यांनी उपजिल्हाधिकाऱ्यांना लेखी निवेदन पाठवले आहे. त्यामुळे ना-हरकत प्रमाणपत्र मिळाल्यानंतर इमारतीची दुरुस्ती केली जाणार आहे.
खिंडीपाडा येथील पालिका शाळेच्या इमारतीची दुरुस्ती करण्यासाठी संबंधित आराखडे व इमारतीचे अस्तित्व सिद्ध करणारी कागदपत्रे विकास नियोजन विभागाच्या कार्यकारी अभियंत्याकडे सादर केली आहेत. ही कागदपत्रे उपजिल्हाधिकाऱ्यांकडेही वर्ग करण्यात आल्याने आता ‘ना-हरकत’ प्रमाणपत्राची औपचारिक मंजुरी अपेक्षित आहे. या दुरुस्तीच्या कामामुळे शाळेतील विद्यार्थ्यांना अधिक सुरक्षित व सुसज्ज शैक्षणिक सुविधा मिळू शकतील, असेही अधिकाऱ्यांनी नमूद केले आहे.