हार्बर मार्गाची वाहतूक विस्कळित

हार्बर मार्गाची वाहतूक विस्कळित
सिग्नल यंत्रणेत बिघाड; प्रवाशांचे हाल

सकाळ वृत्तसेवा
मुंबई, ता. २९ : जुईनगर ते वाशी यादरम्यानच्या रेल्वेस्थानकांत सिग्नल बिघाडामुळे मंगळवारी (ता. २९) दुपारी लोकल सेवा विस्कळित झाली होती.  त्यामुळे अप-डाऊन मार्गावरील लोकल खोळंबल्या होत्या. या घटनेमुळे सीएसएमटीकडे जाणाऱ्या लोकल उशिराने धावत असल्याने प्रवाशांचे हाल झाले.
मिळालेल्या माहितीनुसार, मंगळवारी दुपारी  दीड वाजण्याच्या सुमारास सिग्नल यंत्रणेत तांत्रिक बिघाड झाला. त्यामुळे सीएसएमटी ते पनवेल अप-डाऊन  दिशेने जाणारी हार्बर मार्गावरील लोकल सेवा  आणि ठाणे ते पनवेल अप-डाऊन ट्रान्स हार्बर मार्गावरील लोकल वाहतूक काही काळ खोळंबली. लोकल गाड्यांमध्ये प्रवासी अडकून पडले होते.  या घटनेची माहिती मिळताच मध्य रेल्वेचे अभियांत्रिकी पथक घटनास्थळी दाखल झाले. अवघ्या १८ मिनिटांत हा बिघाड दुरुस्त करण्यात आला. या घटनेमुळे रेल्वेस्थानकांवर प्रवाशांची गर्दी उसळली होती. या घटनेचा परिणाम हार्बर मार्गावरील लोकल सेवांवर संध्याकाळपर्यंत दिसून आला.