...म्हणून प्रवीण गायकवाड यांच्यावर शाईफेक

...म्हणून प्रवीण गायकवाड यांच्यावर शाईफेक
शिवधर्म फाउंडेशनच्या दीपक काटे यांचा दावा
सकाळ वृत्तसेवा
ठाणे, ता. २९ : ‘छत्रपती संभाजी महाराज यांचा संभाजी ब्रिगेडकडून होणारा एकेरी उल्लेख, संभाजी ब्रिगेडकडून सदैव हिंदू देव-देवतांचा अपमान करणे, जाणूनबुजून त्यांच्या संघटनेचे नाव न बदलणे, यामुळे प्रवीण गायकवाड यांच्यावर शाईफेक करण्यात आली,’ असा दावा शिवधर्म फाउंडेशनचे संस्थापक दीपक काटे यांनी मंगळवारी (ता. २९) पत्रकार परिषदेत बोलताना केला.

संभाजी ब्रिगेडचे अध्यक्ष प्रवीण गायकवाड यांच्यावर अक्कलकोट येथे झालेल्या शाईफेकीच्या प्रकाराबाबत दीपक काटे यांनी आपली भूमिका स्पष्ट केली. ते म्हणाले, ‘यापूर्वी आम्ही वारंवार त्यांना विनंती केली होती, की त्यांनी त्यांच्या संघटनेचे नाव बदलावे. संभाजी राजे किंवा महाराज ब्रिगेड असा उल्लेख करावा, असे अनेक पर्याय दिल होते; पण त्यांनी नाव बदलले नाही तसेच कायद्यानुसार महापुरुषांचे नाव एखाद्या संघटनेला देण्यास मनाई असतानादेखील नाव देण्यात आले आहे. आम्ही नाव बदलण्याबाबत प्रवीण गायकवाड यांच्याशी वारंवार चर्चा केली. त्यांनी छत्रपती नाव पुढे लावण्यास अडचण आहे; मात्र त्यांनी नावात बदल केला नाही. जर आमच्या राजाचा अपमान होत असेल तर आम्ही तो सहन करणार नाही. त्यांनी पुढे जाऊन संघटनेचे नाव बदलावे,’ असे आवाहनही काटे यांनी केले. तसेच आमचा प्रवीण गायकवाड यांच्या संघटनेला आणि कार्याला विरोध नाही. फक्त त्यांनी त्यांच्या संघटनेचे नाव बदलावे, अशी आमची मागणी असल्याचे काटे यांनी या वेळी स्पष्ट केले.
..
‘ब्रिगेड’च्या कार्यकर्त्यांची घोषणाबाजी
शिवधर्म फाउंडेशनच्या मंगळवारी झालेल्या पत्रकार परिषदेपूर्वी ठाण्यातील टीप टॉप प्लाझासमोर संभाजी ब्रिगेडच्या काही कार्यकर्त्यांनी जोरदार घोषणाबाजी केली. या वेळी घोषणाबाजी करणाऱ्या संभाजी ब्रिगेडच्या कार्यकर्त्यांना ठाणे पोलिसांनी ताब्यात घेतले.