रायगडमधील दोन कृषी सेवा केंद्रांचे परवाने निलंबित

रायगडमधील दोन कृषी सेवा केंद्रांचे परवाने निलंबित
अलिबाग, ता. २९ (वार्ताहर) : शेतकऱ्यांची फसवणूक रोखण्यासाठी रायगड जिल्हा अधीक्षक कृषी अधिकारी कार्यालयाने कारवाई सुरू केली आहे. जिल्ह्यातील सर्व कृषी सेवा केंद्रांची तपासणी सुरू असून, कृषी सेवा केंद्रांमध्ये झालेल्या नियमभंगामुळे पनवेल आणि अलिबाग तालुक्यातील पोयनाड येथील कृषी सेवा केंद्रांचे परवाने निलंबित करण्यात आले आहेत.

खत नियंत्रण आदेश १९८५नुसार रासायनिक खतांचा साठा अद्ययावत ठेवणे, खताची विक्री कमाल दरापेक्षा जास्त किमतीत न करणे, शेतकऱ्यांना ‘एम’ फॉर्ममध्ये बिले देणे तसेच विक्री देयकांमध्ये सर्व आवश्यक तपशिलांचा समावेश करणे आणि अनुदानित खताची विक्री पॉस मशीनद्वारेच करणे या अटी बंधनकारक आहेत. मात्र तपासणीत पनवेल येथील दीपा कृषी सेवा केंद्र व पोयनाड येथील भूषण कृषी सेवा केंद्रात या अटींचे उल्लंघन झाल्याचे आढळून आले. या वेळी तपासणीत रजिस्टरमधील शिल्लक खतसाठा, पॉस मशीनमधील खत साठा व प्रत्यक्ष साठ्यामध्ये फरक आढळला. तसेच शेतकऱ्यांना योग्य पावत्या न देणे व कमाल विक्री दरापेक्षा जास्त दराने खत विक्री केल्याचे निदर्शनास आले. या पार्श्वभूमीवर जिल्हा अधीक्षक कृषी अधिकारी कार्यालयाने दोन्ही कृषी सेवा केंद्रांचे परवाने निलंबित केले आहेत. पुढील काळात जिल्ह्यातील सर्व सेवा केंद्रांची तपासणी अधिक काटेकोरपणे करण्यात येणार असून, नियमभंग करणाऱ्यांवर कठोर कारवाईचा इशारा प्रशासनाने दिला आहे.