विद्याविहार उड्डाणपुल एक वर्षानंतर पूर्ण होणार

विद्याविहार उड्डाणपूल एक वर्षानंतर सेवेत
सकाळ वृत्तसेवा
मुंबई, ता. २९ : विद्याविहार रेल्वेस्थानकावरून जाणारा आणि पूर्व-पश्चिम जोडणारा उड्डाणपूल मुंबई महापालिकेच्या वतीने बांधण्यात येत आहे. या प्रकल्पाचे संपूर्ण काम पुढच्या वर्षी ३१ जुलै रोजी पूर्ण करण्याचा निर्धार पालिकेने व्यक्त केला आहे.
घाटकोपर परिसरात पूर्वेकडील रामचंद्र चेंबूरकर मार्ग आणि पश्चिमेकडील लालबहादूर शास्त्री मार्ग यांना जोडण्यासाठी विद्याविहार रेल्वे स्थानक रुळांवरून जाणारा उड्डाणपूल पालिकेच्या पूल विभागाच्या वतीने बांधण्यात येत आहे. या उड्डाणपुलाच्या निर्मितीमध्ये रेल्वेरुळांवरून जाणारा सुमारे १०० मीटर अंतराचा मुख्य पूल समाविष्ट असल्याचे बांगर यांनी स्पष्ट केले. या प्रकल्‍प कामाचा पालिका मुख्यालयातील बैठकीत आढावा घेण्यात आला. या वेळी एन विभागाचे सहाय्यक आयुक्‍त डॉ. गजानन बेल्‍लाळे, उपप्रमुख अभियंता (पूल) राजेश मुळ्ये यांच्‍यासह संबंधित अधिकारी, अभियंते या बैठकीस उपस्थित होते.

बाधितांचे होणार पुनर्वसन
पुलाच्‍या पूर्व बाजूकडील सर्व कामे डिसेबरपर्यंत पूर्ण करावीत. तसेच पश्चिम बाजूकडील बाधित बांधकामांची पुनर्वसन प्रक्रिया पूर्ण करून पावसाळ्यानंतर निष्‍कासन करावे. त्‍यानंतर पुढील पाच महिन्‍यांत पुलाची उर्वरित कामे जलद गतीने मार्गी लावावीत. प्रकल्पामुळे बाधित व्यक्तींचे पर्यायी घरे देऊन पुनर्वसन करावे. त्‍यासाठी कालमर्यादा  निश्चित करावी, असे स्‍पष्‍ट निर्देश अतिरिक्‍त पालिका आयुक्‍त (प्रकल्‍प) अभिजित बांगर यांनी दिले.

६५० मीटर लांबीचा प्रकल्प
- रेल्वे रुळांवर १०० मीटर पूल
- पूर्व बाजूस २२० मीटर आणि पश्चिमेस ३३० मीटर पोहोच मार्गाचे काम
- उड्डाणपुलावरून रेल्वे स्थानकाच्या फलाटांवर जाण्यासाठी जोडमार्ग
- रेल्वे तिकीट खिडकी कक्ष, स्थानक मास्तर कार्यालय, जिना यांची पुनर्बांधणी
- उड्डाणपुलाच्या दोन्ही बाजूस सेवा मार्ग
- उड्डाणपुलासाठी प्रत्येकी तब्बल १,१०० मेट्रिक टन वजनी सुमारे १०० मीटर लांबीचे असे दोन गर्डर यशस्वीपणे स्थापन