नेरुळमध्ये आढळला अज्ञात मृतदेह

नेरूळमध्ये आढळला अज्ञात मृतदेह
नवी मुंबई, ता. २९ (वार्ताहर) : नेरूळ येथे सायन-पनवेल मार्ग आणि सेवा रस्त्यालगतच्या झुडपामध्ये मंगळवारी (ता. २९) सायंकाळी एका व्यक्तीचा मृतदेह आढळून आला. हा मृतदेह सडल्याने त्याची ओळख पटविण्याचे काम पोलिसांकडून सुरू आहे. पोलिसांनी हा मृतदेह शवविच्छेदनासाठी पाठवून दिला असून त्यानंतरच या व्यक्तीचा मृत्यू नेमका कशामुळे झाला, हे स्पष्ट होणार असल्याचे पोलिसांनी सांगितले. नेरूळ येथे सायन-पनवेल मार्ग व सेवा रस्त्यामधील झुडपामध्ये मंगळवारी सायंकाळी चार वाजण्याच्या सुमारास दुर्गंधी येत असल्याचे काही नागरिकांच्या लक्षात आल्यानंतर त्यांनी पोलिसांना याबाबतची माहिती दिली. त्यानंतर तुर्भे एमआयडीसी पोलिसांनी घटनास्थळी धाव घेत पाहणी केली असता, याठिकाणी एका अज्ञात व्यक्तीचा मृतदेह आढळून आला. मृत व्यक्ती अंदाजे ३५ ते ४० वयोगटातील आहे. या व्यक्तीचा मृत्यू तीन ते चार दिवसांपूर्वी झाल्याची शक्यता पोलिसांनी व्यक्त केली आहे. त्यांची ओळख पटविण्याचे काम पोलिस करीत आहेत.