रोहा-तांबडी रस्ता डेंजर झोन

रोहा-तांबडी रस्ता धोकादायक
मुसळधार पावसामुळे दरड कोसळण्याची भीती; प्रवाशांमध्ये संताप
रोहा, ता. ३० (बातमीदार) ः रोहा ते तांबडी मार्गावरील डोंगराळ पट्टा सध्या मुसळधार पावसामुळे धोकादायक बनला आहे. डोंगरावरील सात ते आठ ठिकाणी माती सरकली असून, झाडांसह मोठे दगड डोंगर उतारावरून रस्त्यावर येण्याची शक्यता व्‍यक्‍त करण्यात येत आहे. विशेष म्‍हणजे मुख्य जिल्हा मार्ग क्रमांक ५० हा रस्ता असंख्य गावांना जोडणारा महत्त्वाचा मार्ग असला, तरी यावर्षीच्या मुसळधार पावसामुळे या मार्गावर दरड कोसळण्याचा धोका निर्माण झाला आहे.
रोहा-तांबडी हा जोड रस्ता रोहा, मुरूड, तळा तसेच तांबडी, बाराशेत, म्हसाडी, सवाणे व वाली, भालगाव आदी अनेक गावांना जोडले गेलेला आहे, मात्र गेल्या दोन ते तीन आठवड्यांपासून प्रचंड पाऊस सुरू असून, डोंगरावरील माती भुसभुशीत झाली आहे. यामुळे झाडांसह मोठे दगड रस्त्यावर कोसळण्याची शक्यता वर्तवली जात आहे. या मार्गावरील हनुमान नगर आणि हनुमान टेकडी परिसरात चढणीचे वळण अत्यंत धोकादायक बनली असून, वाहनचालकांना कसरत करावी लागत आहे. पावसाचा जोर असाच राहिला, तर संपूर्ण रस्ता बंद होण्याचा धोका आहे. या मार्गावर कोणतीही पथदिव्यांवी व्यवस्था नसल्याने रात्री अपघात होण्याचा धोका अधिक आहे. विशेषतः सायकल, दुचाकी आणि खासगी वाहनांसाठी हा रस्‍ता अत्‍यंत धोकादायक बनला आहे. त्‍यामुळे वाहनचालकांसह स्थानिक प्रवाशांमध्ये भीतीचे वातावरण असून, अनेक नागरिकांनी सोशल मीडियावर संताप व्यक्त केला आहे.
....................
सूचनाफलक लावण्याची मागणी
प्रवाशांनी सार्वजनिक बांधकाम विभागाकडे मागणी केली आहे की, धोकादायक वळणांवर स्लोप स्टॅबिलायझेशन, संरक्षक भिंती, सूचनाफलक आणि आवश्यक ठिकाणी कठडे लावावेत. तसेच रस्त्यालगत पाण्याचा निचरा नीट व्हावा यासाठी जलवाहिन्या तयार कराव्यात. या मार्गावर दरवर्षी दरडी कोसळतात आणि वाहतूक ठप्प होते, तरीही लोकप्रतिनिधींच्या दुर्लक्षामुळे ही समस्या कायम आहे, असा नागरिकांचा आरोप आहे.
...................
यंदाच्या पावसाळ्यात दोन ठिकाणी दरड कोसळली होती. घटनेची माहिती मिळताच तातडीने रस्ता मोकळा करण्यात आला, मात्र नागरिकांनीही प्रवास करताना खबरदारी घ्यावी.
- शशिकांत घाडगे, उपअभियंता, सार्वजनिक बांधकाम विभाग