संदीप नाईक कोणत्या पक्षात याची कल्पना नाही - जिल्हाध्यक्ष चंद्रकात पाटील

संदीप नाईक कोणत्या पक्षात कल्पना नाही
जिल्हाध्यक्ष चंद्रकात पाटील यांचे स्पष्टीकरण
वाशी, ता. ३० (बातमीदार)ः बेलापूर विधानसभेत राष्ट्रवादी कॉँग्रेस शरदचंद्र पवार गटाच्या तुतारी चिन्हावर निवडणूक लढवणारे संदीप नाईक पक्षाच्या कार्यक्रमाला किंवा बैठकीत उपस्थित नसल्याने हा विषय चर्चेचा बनला आहे. त्यांनी राष्ट्रवादी शरदचंद्र पवार गटाच्या पक्षाचा राजीनामा दिलेला नाही. अशातच नवी मुंबई राष्ट्रवादी शरद पवार गटाचे जिल्हाध्यक्ष चंद्रकांत पाटील यांनी पत्रकार परिषदेत संदीप नाईक कोणत्या पक्षात आहेत, याची कल्पना नसल्याचे स्पष्टीकरण दिल्याने चर्चा सुरू झाली आहे.
संदीप नाईक यांनी भाजपच्या जिल्हा अध्यक्ष पदाचा राजीनामा देत बेलापूर विधानसभा मतदारसंघातून महाविकास आघाडीच्या शरदचंद्र पवार गटातून निवडणूक लढवली होती. दरम्यान, त्यांच्या पराभवानंतर त्यांनी राष्ट्रवादीच्या कोणत्याच कार्यक्रमाला हजेरी लावली नाही. त्यांनी बेलापूर विधानसभेतून बेलापूर येथील जनसंपर्क कार्यालयातून जनसंवाद या उपक्रमाच्या माध्यमातून राजकीय कार्य चालू ठेवले आहे. पण त्यांच्या जनसंपर्क कार्यालयात कोणत्याच पक्षाचा झेंडा नसल्याचे दिसून येत आहे. अशातच नवी मुंबईतील शरदचंद्र पवार गटाच्या जिल्हा अध्यक्षांनी संदीप नाईक कोणत्या पक्षात आहेत, याची कल्पना नसल्याचे स्पष्ट केल्यामुळे राजकीय तर्क-वितर्क लढवले जात आहेत.