श्रावणात भाजीपाल्याच्या भावात घसरण

श्रावणात भाजीपाल्याच्या भावात घसरण
गृहिणींना दिलासा; एपीएमसीत गाड्यांची वाढली आवक
तुर्भे, ता. ३० (बातमीदार) : श्रावण महिन्याची सुरुवात होताच अनेक कुटुंबांमध्ये शाकाहाराला प्राधान्य दिले जाते. त्यामुळे भाजीपाल्याची मागणी वाढणे साहजिक आहे, मात्र यंदा या मागणीच्या तुलनेत पुरवठा भरपूर झाल्यामुळे घाऊक व किरकोळ बाजारात भाजीपाल्याच्या भावात लक्षणीय घसरण झाली असून, गृहिणींना याचा मोठा दिलासा मिळत आहे.
वाशीच्या घाऊक भाजीपाला बाजारात दररोज सुमारे ६०० ते ६५० गाड्यांमधून भाजीपाल्याची आवक होत आहे. यंदा पावसाच्या सुरळीत हजेरीमुळे शेतकऱ्यांना लागवडीसाठी भरपूर पाणी मिळाले. त्यामुळे पीक चांगले आले असून, श्रावणाच्या पार्श्वभूमीवर वेळेवर योजना आखून शेतकऱ्यांनी मोठ्या प्रमाणात भाजीपाला बाजारात आणला आहे. परिणामी अनेक भाज्यांचे भाव ४० ते ५० टक्क्यांनी घसरले आहेत.
..................
घाऊक व किरकोळ भाव (रु/किलो):
भेंडी ४०-४५ रुपये (किरकोळ ६०-८० रुपये), घेवडा ३०-३६ रुपये (किरकोळ ६०-८० रुपये), फ्लॉवर २०-४० रुपये (किरकोळ ४०-६० रुपये), कोबी १०-१२ रुपये (किरकोळ ४०-६० रुपये), तोंडली ३०-४० रुपये (किरकोळ ५०-६० रुपये), दुधी १६-२० रुपये (किरकोळ ४०-६० रुपये) असे भाव आहेत.
.....................
गवार, फरसबी महागच
या दोन्ही भाज्या हाताने खुडाव्या लागतात, पण पावसामुळे कामगारांची टंचाई निर्माण झाली आहे. परिणामी गवार व फरसबीचे भाव घाऊक बाजारात ५०-७० रुपये आहेत व किरकोळ बाजारात त्यांचा भाव अधिक आहे, तर टोमॅटो वगळता बहुतांश भाज्यांचे भाव सामान्य ग्राहकांच्या आवाक्यात आले आहेत. हिरव्या मटारच्या भावात विशेष घसरण झाली असून, तो आता घाऊक बाजारात ८०-९० रुपये किलो भावाने मिळत आहे, जो मागील आठवड्यात १५०-१६० रुपये किलो होता. किरकोळ बाजारात मटार १२० रुपये किलो भावाने विकला जातोय, जो मागील आठवड्यात २०० रुपयेपर्यंत पोहोचला होता.
........
कोथिंबीर, पालेभाज्यांनी दिलासा
या आठवड्यापासून कोथिंबीरसोबत मेथी, पालक, शेपू, माठ, चवळी, मुळा या पालेभाज्यांच्या भावातही घसरण झाली आहे. घाऊक बाजारात या भाज्यांच्या एक जुडीला ६-८ रुपयांचा भाव मिळत आहे. त्यामुळे किरकोळ बाजारात या भाज्यांची १०-१५ रुपयांना जुडी मिळत आहे.