रबाळे येथील तलावात तरुणाची आत्महत्या

रबाळे येथील तलावात तरुणाची आत्महत्या
नवी मुंबई, ता. ३० (वार्ताहर) : रबाळे येथील भीमनगरमध्ये राहणाऱ्या आफक मुश्ताक खान (वय २४) या तरुणाने मंगळवारी (ता. २९) दुपारी ठाणे-बेलापूर मार्गालगत असलेल्या रबाळे तलावात उडी घेऊन आत्महत्या केली. त्यानंतर एमआयडीसी पोलिसांनी अग्निशमन दलाच्या साह्याने आफकचा तलावात शोध सुरू केला. अखेर बुधवारी सकाळी ११ वाजण्याच्या सुमारास आफकचा मृतदेह अग्निशमन दलाच्या हाती लागला. रबाळे एमआयडीसी पोलिसांनी हा मृतदेह ताब्यात घेऊन शवविच्छेदनासाठी रुग्णालयात पाठवून दिला आहे. याबाबत अपमृत्यूची नोंद करण्यात आली असून, या तरुणाने आत्महत्या का केली, हे अद्याप स्पष्ट झाले नसल्याचे सहाय्यक पोलिस निरीक्षक स्वप्नील जुईकर यांनी सांगितले. याबाबत अधिक तपास करण्यात येत आहे.