नवी मुंबईत झाडांवर खिळे ठोकून मोठ्या प्रमाणावर जाहिराती

झाडांचा श्वास गुदमरला
नवी मुंबईत झाडांवर खिळे ठोकून मोठ्या प्रमाणावर जाहिराती
तुर्भे, ता. ३० (बातमीदार) ः नवी मुंबईत झाडांना खिळे ठोकून किंवा झाडांच्या फांद्या मोडून होर्डिंग रस्सीने बांधून मोठ्या प्रमाणावर जाहिराती करण्यात आल्या आहेत. यासंदर्भात उद्यान विभाग आणि अनधिकृत बांधकामविरोधी विभाग यांच्याकडून कोणतीही कारवाई केली जात नसल्याचे चित्र शहरात आहे.
नवी मुंबईमध्ये गेल्या काही दिवसांपासून जाहिरातीसाठी झाडांना लक्ष्य करण्याचे प्रमाण वाढले आहे. एपीएमसी आणि महापालिका यांच्याकडून कारवाई होत नसल्याने जाहिरातदारांचे चांगलेच फावले आहे. सीबीडी, नेरूळ, तुर्भे, वाशी, कोपरखैरणे, ऐरोली, दिघा अशा परिसरांत हा प्रकार सर्रासपणे दिसून येत आहे. राजकीय पक्षांचे नेते आणि मंत्री यांच्या वाढदिवसनिमित्त हा प्रकार अधिक दिसून येतो. याप्रकरणी आलेल्या तक्रारींची नोंद घेऊन संबंधितांवर कारवाई करण्याचे आदेश दिले आहेत, असे उद्यान विभागाचे उपायुक्त किसनराव पलांडे यांनी म्हटले आहे.

पालिकेच्या सूचनेला केराची टोपली
विशेष म्हणजे शहरामधील अनेक दुभाजकांमध्ये असलेल्या झाडांवर खिळे ठोकून जाहिराती केल्या आहेत. यामध्ये राजकीय पक्षांच्या तसेच विविध खासगी आस्थापनांच्या जाहिरातींचा समावेश आहे. तसेच शहरातील विविध प्रकारच्या दुकानदारांनी त्यांचे दुकान ग्राहकांच्या त्वरित नजरेस पडावे, यासाठी दुकानासमोरील झाडांवर विद्युत रोषणाई केली आहे. या सर्वांनी महापालिकेच्या या सूचनेला केराची टोपली दाखवली आहे.

पुन्हा परिस्थिती जैसे थे
झाडांना खिळे ठोकून जाहिरात करणे किंवा विद्युत रोषणाई करणे हे पर्यावरण अधिनियमानुसार बेकायदा आहे. यासंदर्भात नवी मुंबई महापालिकेच्या उद्यान विभागामार्फत जाहीर आवाहनही वारंवार प्रसिद्ध करण्यात आले आहे. यामध्ये पर्यावरण अधिनियमानुसार कायदेशीर कारवाई करण्याची तरतूद होती. तर स्थानिक पोलिस ठाण्यात दखलपात्र गुन्हा नोंद केला जात होता. याचा विशेष काही परिणाम या आरोपींवर होत नव्हता. त्यामुळे पालिका आयुक्त डॉ. कैलास शिंदे यांनी गुन्हा करणाऱ्यांवर दंडात्मक कारवाई करण्याचे आदेश दिले. त्यानंतर काही दिवस कारवाई करण्यात आली. नंतर पुन्हा जैसे थे परिस्थिती निर्माण झाली आहे.