मर्चंट नेव्हीमध्ये नोकरीचे आमिष दाखवून १३ तरुणांकडून उकळले २० लाख रुपये

नोकरीच्या प्रलोभनातून १३ तरुणांची फसवणूक
मलाकासा शिपिंग कंपनीवर गुन्हा, २० लाखांना गंडा
नवी मुंबई, ता. ३० (वार्ताहर) ः मर्चंट नेव्हीमध्ये नोकरीला लावण्याचे प्रलोभन दाखवत एका त्रिकूटाने १३ तरुणांकडून २० लाख ६० हजार रुपये उकळल्याची घटना उघडकीस आली आहे. याप्रकरणी वाशी पोलिस ठाण्यात तिघांविरोधात गुन्हा दाखल आहे.
वाशी सेक्टर ३० एमधील इन्फोटेक पार्कमध्ये सहाव्या मजल्यावर मलाकासा शिपिंग नावाने कार्यालय थाटले होते. या वेळी सोशल मीडियाच्या माध्यमातून जहाजावर नोकरी करण्यास इच्छुक असल्यास कॉल करा, अशा प्रकारची जाहिरातबाजी केली होती. या जाहिरातबाजीला भुलून अनेक तरुणांनी वाशी येथील कार्यालयात संपर्क साधला. नोकरीस इच्छुक असलेल्या तरुणांकडून पारपत्रासाठी मुलाखती घेण्याचा बहाणा करण्यात आला. त्यानंतर धीरज डोगरा नावाच्या व्यक्तीने नेव्हीमध्ये कॅप्टन असल्याचे भासवून तरुणांना संपर्क साधला. तसेच निवड झाल्याचे सांगून प्रत्येकी दोन लाख २० हजार रुपये शुल्क जमा करण्यास सांगितले. त्यानंतर सोमवारी (ता. २१) वाशीतील कार्यालयात येण्यास सांगण्यात आले होते.
-----------------------------
तिघेजण फरारी
या प्रकरणात शिवम त्रिवेदी, तनुश बाजपेयी व धीरज डोगरा यांनी संगनमत करून नोकरीच्या प्रलोभनातून तरुणांची आर्थिक फसवणूक केली आहे. या त्रिकूटाने १३ तरुणांकडून २० लाख ६० हजार रुपये उकळले असल्याने रविवारी (ता. २७) वाशी पोलिस ठाणे गाठून तक्रार दाखल केली. त्यानंतर पोलिसांनी फरारी त्रिकूटाचा शोध सुरू केला आहे.