कामाठीपुरा पुनर्विकासासाठी निविदा भरण्यास मुदतवाढ

कामाठीपुरा पुनर्विकासासाठी निविदा भरण्यास मुदतवाढ

सकाळ वृत्तसेवा
मुंबई, ता. ३० : वर्षानुवर्षे रखडलेला कामाठीपुऱ्याचा पुनर्विकास मार्गी लागावा म्हणून म्हाडाने नुकत्याच इच्छुक विकसकांकडून निविदा मागवल्या होत्या. त्यानुसार अपेक्षित प्रतिसाद न मिळाल्याने म्हाडाने आता २६ ऑगस्टपर्यंत निविदा भरण्यास मुदतवाढ दिली आहे. त्यामुळे सुमारे महिनाभराच्या वाढीव मुदतीत तरी विकसक येणार का, याकडे सर्वांचे लक्ष लागले आहे.
कामाठीपुरा हा सुमारे ३४ एकर जागेवर वसला असून, तेथे ९४३ जुन्या मोडकळीस आलेल्या इमारती आहेत. त्यामुळे म्हाडाच्या मुंबई इमारत दुरुस्ती व पुनर्रचना मंडळ या इमारतींचा विकास खासगी विकसकाच्या माध्यमातून करण्याचे नियोजन केले आहे. त्यानुसार रहिवाशांना-भाडेकरूंना ५०० चौरस फुटांची सदनिका दिली जाणार असून, ८०० जागा मालकांना प्रति ५० चौरस मीटर जागेकरिता ५०० चौरस फुटांची एक सदनिका मिळणार आहे. त्या पार्श्वभूमीवर म्हाडाने बांधकाम आणि विकास संस्थेची (सी अँड डीए) नियुक्ती करण्यासाठी निविदा प्रसिद्ध केली आहे. त्याबाबतची निविदा पूर्व बैठकीला रेमंड रियल्टी, अशदान प्रॉपर्टीज लिमिटेड या बांधकाम व्यवसायातील नामांकित कंपन्यांच्या प्रतिनिधींनी हजेरी लावत प्रकल्पाच्या तांत्रिक बाबी जाणून घेतल्या. तसेच त्यांना असलेल्या शंकाही मांडल्या असून, म्हाडाने त्याचे निरसन केल्याचे म्हाडाच्या एका वरिष्ठ अधिकाऱ्याने सांगितले. दरम्यान, ऑनलाइन निविदा भरण्याची अंतिम मुदत २८ जुलैपर्यंत होती; मात्र अपेक्षित प्रतिसाद न मिळाल्याने निविदा भरण्यासाठीची मुदत २६ ऑगस्टपर्यंत वाढवल्याचे म्हाडाच्या एका वरिष्ठ अधिकाऱ्याने सांगितले.