विद्यार्थ्याला मारहाण करणाऱ्या शिक्षकाविरोधात गुन्हा

विद्यार्थ्याला मारहाण करणाऱ्या शिक्षकाविरोधात गुन्हा
डोंबिवली, ता. ३० : विद्यार्थ्याने शिवी दिल्याने त्याला शिक्षकाने मारहाण केल्याची घटना उघडकीस आली आहे. एमआयडीसी परिसरातील एका शाळेत वर्गात आपल्या मित्राबरोबर मस्ती करत असताना या १२ वर्षांच्या मुलाने मित्राला शिवी दिली. ही शिवी वर्गातील शिक्षकाने ऐकली व त्याने या मुलाला मारहाण केली. ही घटना गेल्या आठवड्यात घडली होती. हा सगळा प्रकार मुलाच्या कुटुंबीयांना समजल्यानंतर त्याच्या पालकांनी मानपाडा पोलिस ठाण्यात तक्रार दाखल केली आहे. या दाखल तक्रारीच्या आधारे मानपाडा पोलिसांनी शनिवारी (ता. २६) गुन्हा दाखल केला आहे.