रेड रन मॅरेथॉन स्पर्धा उत्साहात

रेड रन मॅरेथॉन स्पर्धा उत्साहात
पालघर, ता. ३० (बातमीदार) : नॅको व महाराष्ट्र राज्य एड्स नियंत्रण सोसायटीअंतर्गत जिल्हा एड्स प्रतिबंध व नियंत्रण विभाग, जिल्हा सामान्य रुग्णालय, पालघरच्या वतीने सोनोपंत दांडेकर महाविद्यालय, पालघर येथे जिल्हास्तरीय रेड रन मॅरेथॉन स्पर्धा पार पडल्या.
रेड रन मॅरेथॉन स्पर्धेत पालघर जिल्ह्यातील एकूण १० महाविद्यालयांनी सहभाग नोंदवाला. या स्पर्धेचे उद्‍घाटन जिल्हा क्रीडा अधिकारी सुहास वनमाने, आंतरराष्ट्रीय कबड्डीपट्टू व क्रीडा अधिकारी गिरीश एर्नाक, दांडेकर महाविद्यालयाचे प्राचार्य डॉ. किरण सावे, निवासी वैद्यकीय अधिकारी डॉ. योगेश सुरळकर व जिल्हा कार्यक्रम अधिकारी रतन गाढवे यांच्या हस्ते हिरवा झेंडा दाखवून करण्यात आले. या स्पर्धेमध्ये १० महाविद्यालयांतील ५०हून अधिक विद्यार्थ्यांनी सहभाग घेतला. मुला-मुलींसाठी स्वतंत्र गटांमध्ये स्पर्धा घेण्यात आली. विद्यार्थ्यांनी आरोग्य, शिस्त आणि सामाजिक जागरूकतेचा सुंदर संगम घडवून आणला. मुलांमध्ये जी. जी. कॉलेज, वसईचा सुनील राम सहाणे आणि मुलींमध्ये दांडेकर कॉलेज, पालघरची रविना आण्णा खाच यांनी प्रथम क्रमांक मिळवला.
या कार्यक्रमाच्या यशस्वितेसाठी जिल्हा शल्यचिकित्सक डॉ. रामदास मराड यांच्या मार्गदर्शनाखाली व जिल्हा पर्यवेक्षक प्रफुल्लता पाटील यांच्यासह महाविद्यालय प्रशासन, प्राध्यापक वर्ग, एनएसएस अधिकारी व स्वयंसेवक तसेच जिल्हा एड्स नियंत्रण विभाग, ठाणे यांचे योगदान लाभले.