विक्रमगड तालुक्यातील अनेक भागातील शेतकरी वळले पेरभाताकडे

शेतकऱ्यांची पावले पेर भाताकडे
विक्रमगड तालुक्यात कमी मेहनत, खर्चामध्ये दर्जेदार उत्पन्न
विक्रमगड, ता. ३१ (बातमीदार) ः तालुक्यात नवनवीन सुधारित भाताच्या विविध वाणांची लागवड केली आहे. परंतु सद्य:स्थितीमध्ये शेतीत बदल होत असून, त्याअनुषंगाने पावसाचा अनियमितपणा व महागाई, मजुरांची टंचाई यामुळे शेती करणे जिकिरीचे होत आहे. यावर उपाय म्हणून आता तालुक्यातील काही शेतकऱ्यांनी पावसाळा सुरू होताच नांगरणी करून त्यामध्ये पेर भाताची पेरणी केली.

अशा प्रकारे सुरुवातीला शेलपाडा या महसुली गावातील शेतकऱ्यांनी पेर भाताच्या लागवडीस सुरुवात केली असून, उत्पन्न मिळाल्याने हा प्रयोग यशस्वी ठरला आहे. हे पाहून आता अनेक शेतकरी पेर भाताकडे वळू लागले आहे. यामुळे सध्या या भागातील शेतामध्ये दर्जेदार भातरोपे तयार होताना दिसत आहेत. पेर भातलागवडीने शेतीसाठी होणारा खर्च कमी होऊन जादा नफा मिळवता येण्यासारखे आहे. आज शेलपाड्यातील शेतकरी पेर भाताची लागवड करीत असून, चांगले उत्पन्न घेत आहेत. मीदेखील माझ्या शेतामध्ये पेर भातलागवड केली आहे, असे कृषी पदविकाधारक शेतकरी राजाराम ढोणे यांनी म्हटले आहे.

पेर भाताची लागवड
ही पेरणी पातळ व चार बोटांच्या सुटसुटीत अंतराने करून भाताची रोपे तयार होत आल्यावर त्याची लागवड न करता पेर भाताची लागवड केलेल्या शेताची बेननी करून त्यातील गवत काढून टाकून फक्त भाताची रोपे शिल्लक ठेवली जातात आणि बांधावर आलेल्या गवतावर तणनाशक फवारणी करून गवताला मारले जाते.

कमी खर्च
अनावश्यक गवत काढून टाकण्यासाठी बाहेरील मजुरांची गरज नाही तर घरातील लोक हे काम करू शकतात. त्यामुळे २० ते २५ हजार खर्च येथे वाचतो. त्यामुळे कमी मेहनत आणि खर्चात पेर भातलागवड यशस्वी झाली आहे.