वांगणीतील महिला प्रवाशांची बदलापूरकरांवर दादागिरी

वांगणीतील महिला प्रवाशांची बदलापूरकरांवर दादागिरी
लोकल रिकामी असताना चढण्यास आडकाठी; वादाच्या घटनांत वाढ

बदलापूर, ता. ३० (बातमीदार) : रेल्वे प्रवाशांमध्ये होणाऱ्या वादाचे प्रमाण वाढले आहे. डब्यात होणाऱ्या हाणामाऱ्या आणि भांडणे, लोकलमध्ये चढण्यावरून वाद रोजचे झाले आहे. यात आता बादलापूरकर महिला प्रवाशांनीही तक्रारीचा सूर सोडला आहे. कर्जत-मुंबई लोकलमध्ये सकाळच्या ऐन गर्दीच्या वेळी फलाट ३ वरून चढताना महिलांना आडकाठी केली जाते. लोकल रिकामी असूनही त्यांना दरवाजा अडवल्यामुळे चढता येत नसल्याचा संताप व्यक्त केला जात आहे.
घर, कुटुंब सांभाळण्यासाठी महिलाही नोकरीनिमित्त घराबाहेर प्रवास करत आहेत. त्यात बदलापूरसारख्या स्थानकातून दिवसाला ५० हजारांच्या घरात महिला लोकलने प्रवास करतात; मात्र प्रवासादरम्यान त्यांना रोज समस्येला तोंड द्यावे लागत आहे. बदलापूर स्थानकात कर्जत आणि वांगणी मधून येणाऱ्या महिला प्रवाशांकडून दादागिरी होत असल्याचा आरोप केला जात आहे. काही दिवसांपासून कर्जतहून सीएसएमटीकडे जाणारे ७.५१ ची लोकल ही बदलापूर स्थानकात येताच नेरळ आणि वांगणी येथील प्रवासी दरवाजा अडवून महिलांना आत शिरण्यास मज्जाव करत आहे. यामुळे अनेकदा मोठे वाद झाले आहेत.
बदलापूरकर महिला प्रवाशांना लोकलमध्ये चढून देत नाहीत. त्यामुळे लोकल चुकते आणि कामावर पोहचायला उशीर होतो. या संदर्भात रेल्वे प्रशासन आणि पोलिसांकडे तक्रारी केल्या आहेत; मात्र अनेकदा महिला प्रवासी त्यांनाही जुमानत नाहीत. त्यामुळे कडक कारवाई करून बदलापूरकरांचा प्रवास कसा सुखकर होईल, यासाठी रेल्वे प्रशासनाला लक्ष देणे गरजेचे आहे, अशी मागणी हे प्रवासी करत आहेत.

काही दिवसांपासून रोज हा त्रास सहन करावा लागत आहे. आधीच लोकलच्या फेऱ्या बदलापुरात कमी आहेत. त्या तुलनेत प्रवासी संख्याही चार ते पाच पट आहे. कर्जतवरून येणाऱ्या लोकलमध्ये चढताना मोठा त्रास होतो. चढायला दिले जात नाही, त्यामुळे रोज वाद होतात. कित्येक महिला चढताना पडतात, त्यांना दुखापत होते. रेल्वे प्रशासनाने यासंबंधी लक्ष घालावे.
- वर्षा सोनवणे, महिला प्रवासी

दहा ते बारा दिवसांपासून हा प्रकार सर्रास सुरू आहे. आम्ही मनात भीती घेऊन लोकलमध्ये चढतो. रोज कोणाला ना कोणाला दुखापत होते. या संदर्भात रेल्वे पोलिसांकडे तक्रार दिली; पण अजूनही रेल्वे प्रशासनाने लक्ष घातले नाही.
- पूनम जैस्वाल, महिला प्रवासी