बेस्टच्या निवृत्त कर्मचारी थकबाकीपासून वंचित

बेस्टचे निवृत्त कर्मचारी
थकबाकीपासून वंचित
सकाळ वृत्तसेवा
मुंबई, ता. ३० ः बेस्ट उपक्रमातील १ सप्टेंबर २०२२ ते १ मे २०२५पर्यंत अडीच हजार कर्मचारी सेवानिवृत्त झाले. या कर्मचाऱ्यांना उपदान, अंतिम देयक आणि थकबाकी मिळालेली नाही. उच्च न्यायालयाचे आदेश तसेच मुख्यमंत्री देवेंद्र फडणवीस यांनी थकबाकी देण्याचे निर्देश देऊनही कर्मचाऱ्यांना थकबाकीसाठी प्रतीक्षाच करावी लागत आहे.
मागील वर्षभरात निवृत्त कर्मचाऱ्यांची संख्या दोन हजार ८२७ आहे. त्यातील दोन हजार २१५ जणांची उपदान व अंतिम देयके तयार असून त्यांची थकबाकीची रक्कम ४९३.०५ कोटी आहे. त्यांना निवृत्तीनंतर थकीत रकमेवर १० टक्के व्याज द्यावे, अशी मागणी कर्मचाऱ्यांनी केली आहे. काही निवृत्त कर्मचाऱ्यांना केवळ ५५ टक्के थकबाकी मिळाल्याचे सांगण्यात आले.
---
आर्थिक भार एकत्रित उचलावा
निवृत्त कर्मचाऱ्यांच्या थकबाकीचा आर्थिक भार मुंबई महापालिका आणि राज्य शासनाने एकत्रितपणे उचलावा आणि यापुढे बेस्टच्या सर्व कामगारांना ताबडतोब सर्व निवृत्ती देयक आणि थकबाकी मिळतील, याची जबाबदारी घ्यावी, अशी मागणी कर्मचाऱ्यांनी केली आहे.