उल्हासनगरमध्ये इमारतीला भीषण आग

उल्हासनगरमध्ये इमारतीला भीषण आग
अमर पॅलेसमधील सदनिका जळून खाक
उल्हासनगर, ता. ३० (वार्ताहर) : शहरातील ओटी सेक्शनमधील अमर पॅलेस या इमारतीला बुधवारी (ता. ३०) दुपारी आग लागल्‍याची घटना घडली. या आगीच्या विळख्यात या इमारतीमधील दोन सदनिका सापडल्या. शॉर्टसर्किटमुळे ही दुर्घटना घडल्याची शक्यता व्यक्त होत असून, सुदैवाने या घटनेत कोणतीही जीवितहानी झाली नाही; मात्र या आगीत दोन्ही सदनिकांचे मोठे नुकसान झाले.

उल्हासनगर कॅम्प क्रमांक २ मधील ओटी सेक्शन परिसरात बुधवारी दुपारच्या सुमारास अमर पॅलेस या गृहनिर्माण सोसायटीतील दोन सदनिकांमध्ये भीषण आग लागली. अचानक उठलेल्या धुराच्या व आगीच्या ज्वाळांनी संपूर्ण परिसरात भीतीचे वातावरण पसरले. शॉर्टसर्किटमुळे आग लागल्याचा प्राथमिक अंदाज व्यक्त केला जात असून, आगीने काही क्षणांतच रौद्र रूप धारण केले. या आगीत सदनिकामधील फर्निचर, इलेक्ट्रॉनिक वस्तू, कपडे, दागदागिने यासह संपूर्ण संसारच जळून खाक झाला. या घटनेत लाखो रुपयांचे नुकसान झाले असल्याचे सांगितले जात आहे. या घटनेची माहिती मिळताच उल्हासनगर अग्निशमन विभागाच्या दोन गाड्या तत्काळ घटनास्थळी दाखल झाल्या. जवानांनी शर्थीचे प्रयत्न करत सव्वा तासात ही आग आटोक्यात आणली. महापालिकेच्या आपत्ती व्यवस्थापन कक्षाने घटनास्थळी भेट देत परिस्थितीचा आढावा घेतला असून, पुढील तपास सुरू असल्याची माहिती देण्यात आली आहे.