आठ धोकादायक पुलांवरून अवजड वाहतुकीवर बंद

आठ धोकादायक पुलांवरून अवजड वाहतूक बंद
अलिबाग, ता. ३० (वार्ताहर) : जिल्ह्यातील महत्त्वाच्या रस्त्यांवरील पूल वाहतुकीसाठी धोकादायक स्थितीत असल्याचे निदर्शनास आल्यानंतर जिल्हाधिकारी किशन जावळे यांनी या पुलांवरून अवजड वाहनांच्या वाहतुकीवर तत्काळ बंदी घालणारा आदेश बुधवारी (ता. ३०) जारी केला आहे. यामध्ये जिल्ह्यातील आठ पुलांवरून अवजड वाहतूक बंद करण्यात आली आहे.

वीजना कन्सल्टिंग इंजिनिअर्स प्रा.लि. यांच्यामार्फत करण्यात आलेल्या स्ट्रक्चरल ऑडिट अहवालानुसार अलिबाग-रोहा, अलिबाग-रेवदंडा, पोयनाड- उसर- भादाणे व भाकरवड-देहेन या मार्गांवरील एकूण आठ पुलांची भार क्षमता अत्यल्प (पाच ते १६ टन) असल्याचे स्पष्ट झाले. त्यामुळे रामराज पूल, सुडकोली पूल, सहाण पूल, नवेदर बेली पूल, देहेन पूल अवजड वाहतुकीसाठी बंद करण्यात आले आहेत. याला पर्याय म्हणून अवजड वाहतूक अलिबाग, पेझारी नाका, कुडूस, वेलशेत, आंबेघर, भिसे खिंडमार्गे रोहा व अलिबाग, उसर वावेमार्गे रेवदंडा, पांडवा देवी, पोयनाड, पेझारी श्रीगावमार्गे देहेन अशी वळविण्यात आली आहे.
पावसाळ्यामुळे पूल अधिक असुरक्षित झाल्याने वाहनचालकांनी व वाहतूकदार संस्थांनी प्रशासनाच्या आदेशाचे काटेकोर पालन करावे, अपघात टाळण्यासाठी व जनतेच्या सुरक्षेच्या दृष्टीने ही कार्यवाही करण्यात आली आहे. हे आदेश पुढील आदेश येईपर्यंत लागू राहणार असून, नियमभंग करणाऱ्यांविरोधात कडक कारवाई करण्यात येईल, असे जिल्हाधिकारी किशन जावळे यांनी सांगितले.