ऑर्केस्ट्रामध्ये परवानगीपेक्षा जास्त गायिका

उल्हासनगर, ता. ३० (वार्ताहर) : शहरातील कॅम्प नंबर ४ परिसरातील वादग्रस्त नाईंनटी (९०) ऑर्केस्ट्रा बारवर पोलिसांनी मध्यरात्री थेट कारवाई केली. परवानगी असलेल्या आठ गायिकांऐवजी १२ महिलांना ऑर्केस्ट्रामध्ये सादरीकरणासाठी ठेवण्यात आल्याने शासकीय आदेशाचे उल्लंघन केल्याचा ठपका बारचे मालक आणि व्यवस्थापकावर ठेवण्यात आला आहे. ही धडक कारवाई पोलिस उपायुक्त सचिन गोरे, सहाय्यक आयुक्त अमोल कोळी यांच्या मार्गदर्शनाखाली वरिष्ठ पोलिस निरीक्षक अशोक कोळी यांच्या गुन्हे शोध पथकाने केली आहे.
विठ्ठलवाडी पोलिस ठाण्याच्या गुन्हे शोध पथकाला मिळालेल्या माहितीनुसार पोलिस उपनिरीक्षक बंकटस्वामी दराडे, रामदास मिसाळ, दिलीप चव्हाण, संतोष सांगळे, चंद्रकांत गायकवाड, मंगेश वीर यांनी नाईंनटी बार ऑर्केस्ट्रावर मंगळवारी (ता. २९) छापा टाकला. तपासणीदरम्यान, बारमध्ये आठ महिला गायिकांसाठीची परवानगी असतानाही १२ महिला निदर्शनास आल्या. त्यामुळे शासकीय अटींचा भंग होत असल्याचे स्पष्ट झाले. या प्रकरणात विठ्ठलवाडी पोलिस ठाण्यात बारमालक रवी वासिटा आणि व्यवस्थापक वासुदेव साप यांच्याविरोधात गुन्हा नोंदवला आहे. पोलिसांनी चौकशी सुरू केली असून, परवानग्यांचे उल्लंघन करणाऱ्या बारचालकांविरोधात यापुढेही कडक कारवाई करण्यात येईल, असा इशारा पोलिस प्रशासनाने दिला आहे.

नियमांचे उल्लंघन कदापि सहन केले जाणार नाही. परवानगीच्या अटींचा भंग करणाऱ्यांविरोधात कडक कारवाई केली जाईल. उल्हासनगरमधील सर्व बार आणि ऑर्केस्ट्रांवर सतत लक्ष ठेवण्यात येत आहे कायदा व सुव्यवस्थेला बाधा ठरणाऱ्या कोणत्याही प्रकाराला मुभा दिली जाणार नाही.
- सचिन गोरे, पोलिस उपायुक्त