महामार्गावर सोमटा येथे बुलेट च्या धडकेत पादचारी महिलेचा मृत्यू;

दुचाकीच्या धडकेत पादचारी महिलेचा मृत्यू
कासा, ता. ३० (बातमीदार) : मुंबई-अहमदाबाद राष्ट्रीय महामार्गावर सोमटा येथे डोकफोडेपाडा गोकुळ ढाब्याजवळ दुचाकीच्या धडकेत एका पादचारी महिलेचा मृत्यू झाल्याची घटना बुधवारी (ता. ३०) दुपारच्या सुमारास घडली. मुक्ताबाई गंग्या पवार (वय ४५) असे मृत महिलेचे नाव आहे.

प्रज्वल अविनाश वर्तक (वय २६, रा. वसई) हा दुचाकीचालक गुजरातहून मुंबईच्या दिशेने जात होता. या वेळी त्याने रस्त्याच्या एका बाजूने पायी चालणाऱ्या मुक्ताबाई पवार यांना जोरदार धडक दिली. या अपघातात त्यांच्या दोन्ही पायांना गंभीर दुखापत झाली तसेच डोके व अंगाला मोठा मार बसल्यामुळे त्यांचा जागीच मृत्यू झाला. या घटनेची माहिती मिळताच पोलिस उपनिरीक्षक अमोल जाधव, विजय पऱ्हाड आणि त्यांच्या सहकाऱ्यांनी घटनास्थळी धाव घेतली. अपघातग्रस्त महिलेला कासा उपजिल्हा रुग्णालयात हलवण्यात आले, मात्र तेथे पोहोचण्याआधीच त्यांचा मृत्यू झाल्याचे डॉक्टरांनी घोषित केले. पोलिसांनी आरोपी प्रज्वल वर्तक याला ताब्यात घेतले असून, त्याची दुचाकी जप्त करण्यात आली आहे. कासा पोलिस ठाण्यात प्रज्वलविरोधात गुन्हा दाखल करण्याची प्रक्रिया सुरू आहे.