आयुक्त अनिलकुमार पवार यांची ईडीकडून १८ तास चौकशी

आयुक्त अनिलकुमार पवार यांची ईडीकडून १८ तास चौकशी

नालासोपारा, ता. ३० ( बातमीदार) : वसई-विरार महापालिकेचे माजी आयुक्त अनिलकुमार पवार यांच्या निवासस्थानी मंगळवारी सकाळी ८ वाजता ईडीने छापा मारला. त्यानंतर त्यांची १८ तास कसून चौकशी करण्यात आली. यामध्ये पवार यांच्या संलग्न ११ ठिकाणीही एकाच वेळी ईडीकडून छापे टाकण्यात आले.

ईडी कार्यालयातून अधिकृत माहिती जरी समोर आली नसली तरी त्यापैकी एका छाप्यात पवार यांच्या नाशिक येथील नातेवाइकांच्या घरी एक कोटी २५ लाख रोख रक्कम सापडली आहे, तर वसईतील आयुक्त निवासस्थानात काही संशयास्पद कागदपत्रे, ऑनलाइन विदा (डाटा) ही ईडी अधिकारी यांनी जप्त केल्याची माहिती आहे. एकीकडे ईडीने पवार यांच्या घरावर छापा टाकून त्यांची चौकशी केली असता वसईच्या ग्रामीण पट्ट्यातील स्थानिक भूमिपुत्र संघटनेने मात्र फटाके वाजवून आणि पेढे वाटून आनंदोत्सव साजरा केला आहे, तर दुसरीकडे बुधवारी (ता. ३०) महापालिकेच्या मुख्यालयात या छाप्याच्या विविध चर्चा रंगल्या होत्या.

माजी आयुक्त अनिलकुमार पवार यांच्यावर झालेली कारवाई ही निश्चित भूषणावह नाही, यामध्ये जे कोणी दोषी असतील त्यांचीही चौकशी होऊन त्यांच्यावर कारवाई झाली पाहिजे, या प्रकरणाचा मी मुख्यमंत्र्यांकडे पाठपुरावा करणार आहे.
- राजन नाईक, आमदार, नालासोपारा विधानसभा

नागरिकांच्या तक्रारी संदर्भात आम्ही अनेकवेळा आयुक्त अनिलकुमार पवार यांना भेटलो. मात्र त्यांनी काम करण्यापेक्षा कंत्राटदार, बांधकाम व्यावसायिक यांच्या कामांना जास्त प्राधान्य दिले. पालिकाहद्दीत कोट्यावधी रुपयांचे कंत्राटे निघाले, निकृष्ट दर्जाचे झालेल्या कामाचे कंत्राटदारांना पैसे ही मिळाले पण नागरिकांचे मात्र पवारांनी हाल केले. काल जेव्हा त्यांच्यावर ‘ईडी’ची धाड पडली तेव्हा आम्हाला निश्चित आनंद झाला. त्यामुळे आम्ही फटाके वाजवून, पेढे वाटून आनंद साजरा केला
- सुशांत पाटील, अध्यक्ष स्थानिक भूमिपुत्र संघटना