वसई विरार महानगर पालिकेच्या कामगारांचा मोर्च्या

सफाई कर्मचाऱ्यांचा वसई-विरार महापालिकेवर मोर्चा
बोळिंज, ता. ३० (बातमीदार) : वसई-विरार महानगरपालिकेतील सफाई कर्मचाऱ्यांच्या गेल्या अनेक वर्षांपासून प्रलंबित मागण्या पूर्ण होत नसल्याने सफाई कर्मचारी हैराण झाले आहेत. या मागण्यांकडे लक्ष वेधण्यासाठी बुधवारी (ता. ३०) महापालिका मुख्यालयावर अखिल भारतीय जनता पार्टीतर्फे मोर्चा काढण्यात आला.
वसई-विरार महापालिकेअंतर्गत गेल्या अनेक वर्षांपासून सफाई कामगार मूलभूत सुविधांपासून वंचित आहेत. यामध्ये शौचालय, चेंजिंग रूम, उपाहारगृह यांसारख्या मूलभूत सुविधादेखील नसल्याने सफाई कामगारांना नाहक त्रास सहन करावा लागत आहे. त्यातच समान काम समान वेतन, पंधरा दिवस भर पगारी सुट्टी, ग्रॅच्युइटी अशा प्रमुख मागण्या घेऊन २००हून अधित कर्मचाऱ्यांनी बुधवारी वसई-विरार महापालिका मुख्यालयावर मोर्चा काढला. या वेळी या मोर्चाचे नेतृत्व अखिल भारतीय जनता पार्टीचे अध्यक्ष विजय मांडवकर यांनी केले. या वेळी भाजपचे पदाधिकारी सतीश बोंडगे, संजोग येंडे, नीलेश राणे उपस्थित होते. विरार पश्चिम रेल्वेस्थानक परिसर ते मुख्यालयापर्यंत हा मोर्चा काढण्यात आला. यानंतर पालिका मुख्यालयासमोर सभा घेत आयुक्तांना निवेदन देण्यात आले.