द्रुतगती मार्गावर दरड कोसळण्याचा धोका

द्रुतगती मार्गावर दरड कोसळण्याचा धोका
तातडीने ढिगारे उचलण्याची पालिकेकडे मागणी
कांदिवली, ता. ३० (बातमीदार) ः पश्‍चिम द्रुतगती महामार्गावर कांदिवली, मालाड परिसरात दरड कोसळण्याचा धोका असल्‍याने अपघाताची भीती वर्तविण्यात येत आहे. पालिकेने तातडीने ढासळलेले दगड, मातीचे ढिगारे उचलून मार्ग अपघातमुक्‍त करावा, अशी मागणी वाहनचालकांकडून होत आहे.
पश्चिम द्रुतगती महामार्गावर समतानगर पोलिस ठाण्यापासून ते टाइम्स ऑफ इंडियापर्यंत उच्च डोंगराळ भाग आहे. पावसाळ्यात काही ठिकाणी दरड कोसळल्या असून, मोठमोठे दगड रस्त्यावर पडल्याने वाहनचालकांना नाहक मनस्ताप सहन करावा लागत आहे. रस्त्यावर पडलेल्या दरडीतील दगड अजून उचलले नसल्याने वाहतूक कोंडी होऊन अपघात होण्याची दाट शक्यता निर्माण झाली आहे. परिमंडळ ७ अंतर्गत येणाऱ्या डोंगराळ भागात कोसळणाऱ्या दरडींकडे महापालिका व आपत्ती व्यवस्थापन प्राधिकरणाचे दुर्लक्ष होत आहे. गेल्या वर्षी या ठिकाणी पावसाळ्यात काही प्रमाणात दरड कोसळून मातीदेखील रस्त्यावर पडून किरकोळ अपघात झाले आहेत. भूस्‍खलनामुळे भविष्यात घडणारी अघटित घटना टाळण्यासाठी प्रशासनाने येथील डोंगरउतारावर उपाययोजना कराव्यात, अशी मागणी केली जात आहे.
प्रत्येक पावसाळ्यात दरड कोसळते. दरडीमधील दगडगोटे, माती महामार्गावर पडल्याने वाहतूक कोंडी व दुचाकीस्वारांचे किरकोळ अपघात होतात. प्रशासनाने काही प्रमाणात सुरक्षा भिंत उभी केली आहे. काही ठिकाणी संरक्षण भिंत बांधणे गरजेचे आहे. पावसाळ्यात भिंत बांधणे शक्य नसल्‍यास संरक्षण जाळी बसवावी, जेणेकरून कोसळणाऱ्या दगड-मातीला अटकाव होईल आणि वाहनचालक, प्रवाशांना सुरक्षित प्रवास करता येईल, अशी मागणी वाहनचालकांकडून केली जात आहे. पालिका पी उत्तर विभागाचे अभियंता अमोल जाधव यांच्याशी संपर्क साधला असता त्‍यांनी सांगितले, की संबंधित अधिकाऱ्यांसह आपत्कालीन व्यवस्थापन विभागाला याबाबत माहिती देण्यात येईल.