बंद एनटीसी मिल कामगारांच्या व्यथा संसदेत मांडा!

बंद एनटीसी मिल कामगारांच्या व्यथा संसदेत मांडा!
राष्‍ट्रीय मिल मजदूर संघाचा खासदारांकडे आग्रह
शिवडी, ता. ३१ (बातमीदार) ः मुंबईसह राज्यातील सहा एनटीसी गिरण्यांतील कामगार आणि त्यांच्या कुटुंबीयांच्या प्रदीर्घ उपासमारीवर दिल्ली येथील चालू संसदीय अधिवेशनात आवाज उठविण्यात‌‌ यावा, असा आग्रह राष्ट्रीय मिल मजदूर संघाचे अध्यक्ष आमदार सचिन अहिर आणि सरचिटणीस गोविंदराव मोहिते यांनी महाविकास आघाडीच्या खासदारांकडे धरला आहे. कोरोनामुळे या गिरण्या बंद करण्यात आल्या. त्या अद्याप सुरू करण्यात आलेल्या नाहीत.
मुंबईतील टाटा, इंदू क्र. ५, पोद्दार, दिग्विजय तर मुंबईबाहेरीतल बार्शी टेक्सटाइल आणि फिन्ले या सहा गिरण्यांचा समावेश आहे. अलीकडेच महाविकास आघाडीच्या खासदारांना रामिम संघाद्वारे माहिती देण्यात आली आहे. सहा गिरण्यांतील कामगारांना मागील १० महिन्यांपासून पगार मिळालेला नाही. या‌विरुद्ध रामिम संघाचे खजिनदार निवृत्ती देसाई, उपाध्यक्ष रघुनाथ आण्णा शिर्सेकर, बजरंग चव्हाण, सुनील बोरकर, सचिव शिवाजी काळे आदी पदाधिकाऱ्यांनी सातत्याने निदर्शने, ठिय्या आंदोलने करून हा प्रश्न धगधगत ठेवला आहे.

न्यायालयाच्या आदेशाकडे दुर्लक्ष
गिरण्या बंद पडल्या तरी कामगारांना मासिक ५० टक्के वेतन दिले जात होते. आता ते वेतनदेखील मिळत नाही. राष्ट्रीय मिल मजदूर संघाने मुंबई उच्च न्यायालयात धाव घेऊन कामगारांना वेतन त्वरित देण्याचे आदेशही मिळविले होते, पण केंद्र सरकारने किंवा एनटीसी व्यवस्थापनाने उच्च न्यायालयाचा आदेश पाळलेला नाही. केंद्र सरकारने या गिरण्या पूर्ववत चालवाव्यात अन्यथा कामगारांना पूर्ण पगार द्यावा, यापैकी कोणतीही मागणी मान्य न झाल्याने कामगारांना घर चालवणे कठीण होत असल्‍याचे राष्‍ट्रीय मिल मजदूर संघाच्या पदाधिकाऱ्यांनी सांगितले.