एसटी मुख्यालयाला अस्वच्छतेचा वेढा

एसटी मुख्यालयाला अस्वच्छतेचा वेढा
आवारातील सांडपाण्यामुळे डासांची निर्मिती; दुर्गंधीने प्रवासी त्रस्त
ठाणे शहर, ता. ३१ (बातमीदार) : ठाणे जिल्ह्याचा कारभार चालणाऱ्या एसटीच्या मुख्य कार्यालयाला अस्वच्छतेचा वेढा पडला आहे. कार्यालयाच्या आवारात पसरलेली दुर्गंधी आणि सांडपाण्यामुळे येथे डासांची निर्मिती झाली असून, कर्मचाऱ्यांच्या आरोग्याचा प्रश्न उभा राहिला आहे. मुख्यालयाच्या आवारात कचरा, राडारोडा आणि गटारांच्या उघड्या झाकणांमुळे कार्यालयात दुर्गंधी पसरली आहे.

ठाणे जिल्ह्याचा एसटीचा कारभार ठाण्यातील लालबहादूर शास्त्री मार्ग, वंदना सिनेमा परिसरात असललेल्या मुख्यालयातून चालतो. येथे केवळ जिल्हाभरातूनच नव्हे, तर राज्यभरातून कर्मचारी कामाच्या निमित्ताने येतात. निवृत्त झालेल्या कर्मचाऱ्यांचाही येथे सतत राबता असतो; मात्र सध्या पावसात हे मुख्यालय डासांचे आगार बनले आहे. कर्मचाऱ्यांना इमारतीच्या आवारात वावरताना डासांच्या हल्ल्याचा सामना करावा लागतो. विशिष्ट प्रकारचे हे डास अंगावरून हाकलण्याचा प्रयत्न केला तरीही ते उडून न जाता रक्त शोषणाचा प्रयत्न करताना दिसून येतात. इमारतीच्या आवारात पावसाचे पाणी साचले असून, जमिनीतून सतत सांडपाणी वाहात असते. त्यामुळे हा परिसर सतत ओला असतो. तसेच इमारतीच्या पाठीमागील शौचालयातून निघणारी दुर्गंधी मुख्यालयात पसरते. याबाबत विभागीय अभियंते विजय रेडेकर यांना प्रतिक्रिया विचारली असता या विषयावर नंतर बोलू असे सांगून प्रतिक्रिया देणे टाळले.

आवारात सापांचा वावर
इमारतीच्या भिंतीजवळ तोडलेल्या झाडांचे ओंडके ठेवण्यात आले असल्याने येथे अडगळ निर्माण झाली आहे. या ठिकाणी सांपांनी आश्रय घेतल्याचे येथील कर्मचारी सांगतात. शौचालायला जाताना अनेकदा ते दिसून येतात. त्यामुळे त्यांच्याकडून दंश होण्याची भीती कर्मचाऱ्यांकडून व्यक्त होत आहे.

रेकॉर्ड रूमला भेगा
मुख्यालयाच्या मागे कार्यालयाचा रेकॉर्ड रूम असून, त्याच्या भिंतींना भेगा पडल्या आहेत. त्यामुळे त्या कधीही कोसळण्याची शक्यता निर्माण झाली आहे. येथील प्रशिक्षण सभागृहालासुद्धा घाणीच्या पाण्याचा वेढा पडला आहे. प्रशिक्षणार्थिंनादेखील येथे बसणे कठीण होत आहे.