आर्य पापळ शिष्यवृत्ती परीक्षेमध्ये तालुकास्तरावर प्रथम

आर्य पापळ शिष्यवृत्ती परीक्षेमध्ये तालुक्यात प्रथम
माणगाव, ता. ३० (बातमीदार) ः जिल्हा परिषद शाळा तळाशी केंद्र वावोशी येथील आर्य पापळ याने महाराष्ट्र राज्य शिष्यवृत्ती परीक्षेमध्ये ८४.५६ टक्के गुण प्राप्त करून तालुका स्तरावर प्रथम क्रमांक मिळवला आहे, तर जिल्हा गुणवत्ता यादीत चतुर्थ क्रमांक मिळवला. यासाठी त्याच्यावर शुभेच्छांचा वर्षाव करण्यात येत आहे.
२०२४-२५ रोजी जवाहर नवोदय प्रवेश परीक्षेत ९३.७५ टक्के गुण पटकावून आर्य पापळ जवाहर नवोदय विद्यालय निजामपूर रायगड येथे प्रवेश मिळवला, तर राज्यस्तरीय मंथन परीक्षेतही पापळ याने खालापूर सेंटरमध्ये प्रथम क्रमांक प्राप्त केला होता. महाराष्ट्र राज्य गणित अध्यापक मंडळाच्या गणित संबोध परीक्षेत ९८ टक्के गुण मिळवून प्रथम, तर गणित प्रज्ञाशोध परीक्षेत जिल्हा स्तरावर रौप्यपदक आर्य पापळने प्राप्त केले. ऑल इंडिया सैनिक स्कूल परीक्षेतदेखील पास होऊन प्रवेशास तो पात्र झाला. एकाच वर्षात या सर्व परीक्षा देऊन आर्य पापळने घवघवीत यश संपादित केले आहे. यासाठी तळाशी शाळेच्या मुख्याध्यापिका हेमलता आखाडे आणि सहाय्यक शिक्षिका अर्चना घाटे यांनी मार्गदर्शन करत विशेष परिश्रम घेतले.