करवसुली वाढीसाठी आयुक्तांचे स्पष्ट निर्देश

भिवंडी, ता. ३१ (वार्ताहर) : भिवंडी महापालिकेची मालमत्ता करवसुली प्रत्येक आर्थिक वर्षाच्या सुरुवातीला अत्यंत कमी प्रमाणात होत असते. यामुळे पालिकेच्या खर्चावर मर्यादा पडत असतात. या पार्श्वभूमीवर आयुक्त अनमोल सागर यांनी नुकत्याच पार पडलेल्या बैठकीत करवसुली वाढीसाठी ठोस आणि कठोर निर्णय घेतले. बैठकीत मालमत्ता करवसुलीची सद्यस्थिती तपासून घेण्यात आली. यावेळी असमाधानकारक वसुली करणाऱ्या लिपिकांवर कठोर कारवाई करण्यात येईल, असे आयुक्तांनी स्पष्ट केले.
बैठकीला उपायुक्त (कर) विक्रम दराडे, सर्व प्रभाग समितीतील कर निरीक्षक, वसुली लिपिक आणि संबंधित अधिकारी उपस्थित होते. चालू आर्थिक वर्षात मालमत्ता कराच्या व्याजात सवलत देणारी कोणतीही अभय योजना राबवली जाणार नाही, अशी सूचनाही यावेळी देण्यात आली. करवसुलीमध्ये वाढ व्हावी यासाठी जनजागृती मोहीम राबविण्याचे आदेश देण्यात आले आहेत. मोठ्या थकबाकीदारांची यादी चौकाचौकांत बॅनरवर व वर्तमानपत्रांत प्रसिद्ध करण्याचे आदेशही देण्यात आले. तसेच, कर न भरणाऱ्यांवर मालमत्ता जप्तीची मोहीम अधिक तीव्र करण्याचे निर्देश देण्यात आले. आयुक्त सागर यांनी सर्व कर्मचाऱ्यांना कर्तव्यनिष्ठ कामगिरी करून पालिकेच्या उत्पन्नात वाढ साधण्याचे आवाहन केले आहे.