मागासवर्गीय विद्यार्थ्यांसाठी वसतिगृह योजन

मागासवर्गीय विद्यार्थ्यांसाठी वसतिगृह योजना
ऑनलाइन अर्ज १ ऑगस्टपासून सुरू
नवी मुंबई, ता. ३१ (वार्ताहर) ः इतर मागासवर्ग, विमुक्त जाती, भटक्या जमाती, विशेष मागास प्रवर्ग यांच्या उच्चशिक्षण घेणाऱ्या विद्यार्थ्यांसाठी महाराष्ट्र शासनाच्या इतर मागास बहुजन कल्याण विभागामार्फत वसतिगृह व शैक्षणिक सहाय्यक योजनांना सुरुवात करण्यात आली आहे.
या योजनांत ज्ञानज्योती सावित्रीबाई फुले आधार योजना, पंडित दीनदयाल उपाध्याय स्वयंम योजना तसेच शासकीय वसतिगृह योजना यांचा समावेश असून, १ ऑगस्टपासून यासाठी ऑनलाइन प्रवेश प्रक्रिया सुरू होत आहे. https://hmas.mahait.org या अधिकृत संकेतस्थळावर विद्यार्थ्यांना १ ते १७ ऑगस्टदरम्यान अर्ज भरावा लागेल. बी.ए., बी.कॉम., बी.एस्सी. अशा पदवी अभ्यासक्रमात प्रवेश घेतलेल्या तसेच एम.ए., एम.कॉम., एम.एस्सी. अशा पदव्युत्तर शिक्षण घेत असलेल्या विद्यार्थ्यांनाच या योजनांचा लाभ मिळेल, मात्र व्यावसायिक अभ्यासक्रमातील विद्यार्थी अपात्र राहतील. ही योजना मागासवर्गीय विद्यार्थ्यांच्या शैक्षणिक प्रगतीसाठी अत्यंत उपयुक्त असून, वसतिगृह सुविधा व आर्थिक सहाय्य यामुळे उच्च शिक्षणात सातत्य राखणे सोपे होईल. अर्ज प्रक्रिया पार पडल्यानंतर प्रवेशांची अंतिम निवड यादी संबंधित जिल्ह्याचे सहाय्यक संचालक प्रसिद्ध करतील. या योजनांचा अधिकाधिक विद्यार्थ्यांनी लाभ घ्यावा, असे आवाहन इतर मागास बहुजन कल्याण विभागाच्या प्रादेशिक उपसंचालक वंदना कोचुरे यांनी केले आहे. मुंबई विभागात मुंबई शहर, मुंबई उपनगर, ठाणे, पालघर, रायगड, रत्नागिरी आणि सिंधुदुर्ग जिल्ह्यातील विद्यार्थी संबंधित सहाय्यक संचालकांच्या कार्यालयाशी संपर्क साधू शकतात.