नव्या आयुक्तांपुढे अनधिकृत बांधकामाचे आव्हान

नव्या आयुक्तांपुढे अनधिकृत बांधकामाचे आव्हान

विरार, ता. ३१ (बातमीदार) ः वसई विरार पालिकेच्या आयुक्तपदी एम.एम. सूर्यवंशी यांची नुकतीच नियुक्ती झाली आहे. त्यांच्यापुढे सर्वात मोठे आव्हान असेल ते अनधिकृत बांधकामाचे. त्याचबरोबर पालिकेच्या जागांवरील अतिक्रमण उठविण्याचे असेल. त्यांची पर्यटन विकास महामंडळातील कारकीर्द उल्लेखनीय असली तरी या ठिकाणी मात्र त्यांच्या कामाची कसोटी लागणार आहे.
पालिकेत अनेक समस्या असून त्यावर एम. एम. सूर्यवंशींना काम करावे लागणार आहे. एका बाजूला वाढणारी अनधिकृत बांधकामे त्याला पाठीशी घालणारे अधिकारी यांच्यावर त्यांना वचक ठेवावा लागेल. त्याचबरोबर शहरातील नागरी प्रश्न, स्वच्छता, डम्पिंगचा प्रश्न त्याचबरोबर महत्वाचा प्रश्न म्हणजे आरोग्याचा प्रश्न या ठिकाणी महापालिकेची आरोग्य केंद्रे असली तरी मोठे हॉस्पिटल नाही. त्यासाठी सूर्यवंशींना काम करावे लागेल. रखडलेले रंगमंचाचे काम, नाट्यगृह, त्याचबरोबर पायाभूत प्रकल्प या क्षेत्रातही सुधारणा करावी लागेल.
काही दिवसांपासून पालिका अनधिकृत बांधकामानंतर पालिकेच्या रुग्णालयात मिळालेल्या अप्रमाणित औषधांचा साठ्यांची चर्चा आहे. त्यामुळे पालिकेच्या आरोग्य केंद्रातील कामावर लक्ष ठेवावे लागणार आहे. आयुक्तांना राजकीय पक्षांना बाजूला सारून त्याठिकाणच्या अनधिकृत बांधकामांना आळा घालावा लागेल, असे याठिकाणी बोलले जात आहे. त्यातच येणाऱ्या निवडणुकीची प्रभाग रचना हा त्यांच्या समोरचा महत्वाचा प्रश्न राहणार आहे. प्रभाग रचना करताना कोणत्याही पक्षाला झुकते माप न देता प्रभाग रचना करण्याचे मोठे काम सूर्यवंशींना करावे लागणार आहे. सूर्यवंशी यातून कसा मार्ग काढतात हे बघणे औत्सुक्याचे ठरणार आहे.