स्वस्तात सोने देण्याचे अमिष दाखवून लूट

स्वस्तात सोने देण्याचे प्रलोभन दाखवून लूट
नवी मुंबई, ता. ३१ (वार्ताहर) : स्वस्तात सोन देण्याचे प्रलोभन दाखवत एका टोळीने मिरा रोड येथील तरुणासह त्याच्या मित्रांकडून आठ लाख रुपयांची रोख रक्कम उकळून पलायन केल्याची घटना सानपाडा येथे गत २९ जुलै रोजी घडली. सानपाडा पोलिसांनी या प्रकरणातील टोळी विरोधात संगनमत करून फसवणूक केल्याप्रकरणी गुन्हा दाखल करून या टोळीचा शोध सुरू केला आहे.
या घटनेतील तक्रारदार प्रेम वसंत भानुशाली (वय २२) हा तरुण मिरा रोड येथे राहण्यास असून, तो ठाण्यातील एका कॉल सेंटरमध्ये टीम लीडर या पदावर कार्यरत आहे. फेब्रुवारी २०२५ मध्ये राजेश जैन नावाच्या व्यक्तीने व्हॉट्सॲपद्वारे प्रेम भानुशाली याला संपर्क साधला होता. त्या वेळी भामटा राजेश जैन याने त्याला कमी दरात सोने विकत देण्याचे प्रलोभन दाखवले होते. त्यानंतर प्रेमचा या टोळीतील राकेश, खन्ना आणि राजू या व्यक्तींसोबतदेखील संपर्क झाला होता. या टोळीने व्हिडिओ कॉलवर प्रेमला सोन्याची बिस्किटे दाखवून त्याला कमी किमतीत विकत देण्याचे प्रलोभन दाखवले होते. त्यामुळे प्रेम व त्याचे मित्र स्मित भानुशाली, शालेन गुर्जर आणि हर्ष भानुशाली यांनी प्रत्येकी दोन लाख रुपये प्रमाणे एकूण आठ लाख रुपये जमा केले होते. त्यानंतर २९ जुलै रोजी ते सानपाडा येथे आरोपींच्या सांगण्यानुसार सोने घेण्यासाठी गेले होते. ठरलेल्या ठिकाणी राजू नावाच्या व्यक्तीने त्यांची भेट घेऊन त्यांना सायन-पनवेल मार्गावर सानपाडा येथे असलेल्या पादचारी पुलाखाली नेले. त्या ठिकाणी टोळीतील राजू नावाच्या व्यक्तीने सोने दाखवण्याच्या बहाण्याने प्रेम व त्याच्या मित्रांजवळ असलेली रोख रक्कमेची बॅग आपल्याकडे घेतली. याचवेळी वॅगनर कारमधून त्या ठिकाणी आलेल्या तिघांनी राजूला रोख रक्कम असलेल्या बॅगेसह कारमध्ये घालून घटनास्थळावरून पलायन केले. त्यानंतर प्रेम भानुशाली व त्याच्या मित्रांनी सानपाडा पोलिस ठाणे गाठून तक्रार दाखल केली.