गोठीवलीत १० लाखांची वीजचोरी

नवी मुंबई, ता.३१(वार्ताहर): महावितरणच्या भरारी पथकाने गोठीवली गावात ९ लाख ९२ हजारांची वीज चोरी पकडली आहे. वर्षभरापासून हा प्रकार सुरू असल्याचे महावितरणने केलेल्या तपासणीत आढळुन आले आहे. त्यामुळे रबाळे पोलिस ठाण्यात ३६ घरमालक, बांधकाम व्यावसायिक तसेच दुकान चालकांवर गुन्हा दाखल केला आहे.
गोठीवली गाव येथील पुर्णश्री फ्लाझा इमारतीत वीज चोरी होत असल्याची माहिती महावितरणच्या अधिकाऱ्यांना मिळाली होती. त्यामुळे अतिरिक्त कार्यकारी अभियंता वाशी यांच्या निर्देशानुसार भरारी पथकातील सहाय्यक अभियंता कपिल गाठले, वरिष्ठ तंत्रज्ञ विजय पाटील यांनी २ जुलै रोजी दुपारी गोठीवली गावात कारवाई केली होती. यावेळी भरारी पथकाच्या पाहणीत वर्षभरात तब्बल ९ लाख ९२ हजार ३४० रुपयांची वीज चोरी केल्याचे आढळुन आले. या प्रकरणात महावितरणने जागा मालक विजय पाटील, बांधकाम व्यावसायीक अण्णा गडादे, विकास गडादे, पुर्णश्री प्लाझाचे मॅनेजर दिलीपकुमार बरकडे यांच्यासह वीजपुरवठा घेणारे सर्व ३६ घर व दुकानमालकांविरोधात विद्युत कायदा २००३ च्या कलम १३५ नुसार रबाळे पोलिस ठाण्यात गुन्हा दाखल केला आहे.