पांडवादेवी येथे जलद एसटीला थांबा नसल्याने प्रवाशांची गैरसोय

पांडवादेवी येथे जलद एसटीला थांबा नसल्याने प्रवाशांची गैरसोय
पोयनाड, ता. ३१ (बातमीदार) : अलिबाग तालुक्यातील पांडवादेवी येथील एसटीचा बसथांबा जलद गाड्या थांबत नसल्याने प्रवाशांच्या दृष्टीने गैरसोयीचा ठरत आहे. पेण, पनवेल या सर्वथांबे घेणाऱ्या गाड्या सोडल्या, तर कोणतीच येथे एसटी थांबत नाही. त्यामुळे प्रवाशांना पोयनाड गाठावे लागते.
पांडवादेवीपासून आतमध्ये शहाबाज, कमळपाडा, नवीन कमळपाडा, धामणपाडा, घसवड, भाकरवड, नवीन देहेन, देहेन ही गावे आहेत. येथील नागरिकांना मुंबई किंवा पुणे येथे जायचे असल्यास पोयनाड येथे जावे लागते किंवा पुणे, मुंबई येथून आल्यास पोयनाड येथे उतरून स्वतंत्र रिक्षा करून आपापल्या गावामध्ये जावे लागते. रात्री ९ नंतर पोयनाड येथे ऑटो रिक्षावाले नसल्याने तर मोठे हाल होतात.
रात्रीच्या वेळेस पेणहून अलिबागकडे जाणाऱ्या एसटी बस विनंती करूनही पांडवादेवी येथे थांबत नाहीत. त्यामुळे प्रवाशांना पोयनाड येथे उतरून परत मागे यावे लागते. यामध्ये ज्येष्ठ नागरिक, महिला, लहान मुले यांचे मोठे हाल होतात. त्यामुळे पांडवादेवी येथे अलिबाग येथून मुंबई, पुण्याकडे जाणाऱ्या व येणाऱ्या जलद एसटी गाड्यांना थांबा द्यावा व प्रवाशांची गैरसोय दूर करावी, अशी मागणी पांडवादेवी आणि पाच पाड्यातील तसेच देहेन, भाकरवड येथील नागरिक करत आहेत.