बेस्टची अडचण, आरटीओच्या फिटनेस प्रमाणपत्राच्या प्रतिक्षेत

विद्युत दुरुस्तीसाठीच्या कंत्राटी कार ठप्प
फिटनेस प्रमाणपत्राअभावी ‘बेस्ट’ची अडचण

सकाळ वृत्तसेवा
मुंबई, ता. ३१ ः मुंबई शहरात कुठेही वीज खंडित झाली, की बेस्टच्या नियंत्रण कक्षात नागरिकांचे मोबाईल खणाणतात. विजेचा असा बिघाड झाल्यास तातडीने धाव घेण्यासाठी बेस्टच्या अधिकाऱ्यांसाठी असलेल्या जीप गाड्यांचे आयुर्मान संपल्याने त्या भंगारात गेल्या आहेत आणि कंत्राटदाराकडून बेस्टने घेतलेल्या १४२ कारपैकी १०० कार आरटीओचे फिटनेस प्रमाणपत्र नूतनीकरण न झाल्याने अनेक दिवस आगारात ठप्प आहेत, त्यामुळे बेस्टची अडचण झाली आहे.
बेस्टने विद्युत विभागासाठी घेतलेल्या १४२ पैकी ४२ गाड्यांचे फिटनेस रिन्युअर सर्टिफिकेट घेतले असून उर्वरित गाड्यांचे प्रमाणपत्रासाठी अर्ज केले असून त्याची प्रतीक्षा असल्याचे बेस्टचे जनसंपर्क अधिकारी सुधास सावंत यांनी सांगितले. बेस्टच्या मालकीच्या जीप आयुमर्यादा संपल्याने भंगारात गेल्या आहेत. त्यामुळे बेस्टकडे खासगी कंत्राटदाराकडून कार घेण्याशिवाय पर्याय उरला नव्हता. बेस्ट उपक्रमाने नागपूर येथील सरगो ओव्हरसीज प्रायव्हेट लिमिटेड या खासगी कंपनीकडून भाडेतत्त्वावर १४२ कार घेतल्या. शहरात कुठेही विद्युत बिघाड झाल्यास अधिकाऱ्यांना तातडीने त्या ठिकाणी पोहोचता यावे, यासाठी त्या घेण्यात आल्या. या कंत्राटदाराने या कारसाठी आरटीओची फिटनेस सर्टिफिकेट घेतले नसल्याने त्या आगारामध्ये पडून आहेत. या गाड्यांकडे वैध फिटनेस प्रमाणपत्र आणि इन्शुरन्स नसल्याचे उघड झाल्यानंतर बेस्टच्या चालकांनी त्या चालवण्यास ठाम नकार दिला आहे. या गाड्या चालविणारे चालक ‘बेस्ट’चे असून ते बसून आहेत.