आज शिक्षण विभागातील अधिकाऱ्यांचे एक दिवसीय सामूहिक रजा आंदोलन

शिक्षण विभागातील अधिकाऱ्यांचे
आज एकदिवसीय सामूहिक रजा आंदोलन
मुंबई, ता. ३१ : नागपूर विभागातील बोगस शालार्थ प्रकरणात संबंध नसलेल्या अधिकाऱ्यांचीही चौकशी करून त्यांना अपमानास्पद वागणूक विविध यंत्रणांकडून दिली जात आहे. त्यामुळे शिक्षण विभागातील सर्व अधिकाऱ्यांनी शुक्रवारी (ता. १) एकदिवसीय सामूहिक रजा आंदोलन पुकारले आहे.
सरकारने आमच्यावर होत असलेल्या चौकशा आणि आमच्या मागण्यांची दखल घेतली नाही, तर ८ ऑगस्टपासून बेमुदत सामूहिक रजा आंदोलन छेडले जाईल, असा इशारा महाराष्ट्र राज्य राजपत्रित अधिकारी महासंघ संलग्न महाराष्ट्र शिक्षण सेवा राजपत्रित अधिकारी संघाने आज दिला आहे.
बोगस शालार्थ आयडी देण्याचा गुन्हा केला असेल त्यांच्यावर कायदेशीर कारवाई व्हावी, अशी संघटनेची मागणी आहे; मात्र या प्रकरणात ‘चोर सोडून संन्याश्याला फाशी’ या म्हणीप्रमाणे तपास यंत्रणा काम करीत आहेत. यामुळे शिक्षण विभागातील अधिकाऱ्यांमध्ये दहशत व भीतीचे वातावरण निर्माण झाले आहे. त्यामुळे राज्यातील शालेय शिक्षण विभागातील अधिकारी प्रचंड ताणतणावाखाली काम करीत असल्याचे संघटनेचे म्हणणे आहे.

संरक्षणासाठी लेखी हमीची मागणी
महाराष्ट्र शिक्षण सेवेतील अधिकारी हे राजपत्रित अधिकारी आहेत. ते गुन्हेगार नसून काम करीत असताना काही त्रुटी होऊ शकतात. त्यासाठी विभागांतर्गत चौकशीची व कारवाईची व्यवस्था कार्यरत आहे. अधिकाऱ्यांच्या कामात अनियमितता आढळल्यास महाराष्ट्र नागरी सेवा नियमाप्रमाणे शास्तीची तरतूद आहे. या बाबीचा निषेध म्हणून व जोपर्यंत शिक्षण विभागातील अधिकाऱ्यांना विभागाच्या परवानगीशिवाय विनाचौकशी अटकेपासून संरक्षणाची लेखी हमी सरकारकडून मिळावी, अशी मागणी संघटनेकडून करण्यात आली आहे.