पालिका विभाग कार्यालयांचा ‘सुवर्ण’ प्रमाणपत्राने गौरव

पालिका विभाग कार्यालयांचा
‘सुवर्ण’ प्रमाणपत्राने गौरव 
पर्यावरणपूरक उपाययोजनांबद्दल कौतुक
सकाळ वृत्तसेवा
मुंबई, ता. १ : पर्यावरणपूरक उपाययोजनांचा उत्कृष्टपणे अवलंब केल्याबद्दल मुंबई महापालिकेच्या ना. म. जोशी मार्ग येथील जी (दक्षिण) विभाग कार्यालयाला इंडियन ग्रीन बिल्डिंग कौन्सिल (आयजीबीसी) यांच्या वतीने ‘सुवर्ण’ प्रमाणपत्राने सन्मानित करण्यात आले आहे.

इंडियन ग्रीन बिल्डिंग कौन्सिल (आयजीबीसी) ही भारतीय उद्योग महासंघाच्या (सीआयआय) अंतर्गत कार्यरत असलेली एक राष्ट्रीय संस्था आहे. भारतात हरित इमारतींच्या चळवळीला चालना देण्यासाठी कार्य करते. शाश्वत बांधकाम, पर्यावरणस्नेही तंत्रज्ञान आणि ऊर्जा कार्यक्षमतेला प्रोत्साहन देणे हा या संस्थेचा उद्देश आहे. याअंतर्गत विविध प्रकारचे बांधकाम, इमारती, शाळा, आरोग्य सुविधा आदी घटकांना, हरित इमारतींना प्रमाणपत्र दिले जाते. आयजीबीसीच्या श्रेयांकाचे प्लॅटिनम, गोल्ड, सिल्व्हर आणि सर्टिफाइड असे प्रकार आहेत. यापैकी ‘सुवर्ण’ (गोल्ड) प्रमाणपत्र मिळविणे म्हणजेच या इमारतीने पर्यावरणीयच्या संवर्धाच्या बाबतीत उच्च गुणवत्ता गाठल्याचे मानले जाते.
आयजीबीसीच्या ‘हरित विद्यमान इमारत श्रेयांक पद्धत’ (ग्रीन एक्झिस्टींग बिल्डिंग रेटिंग सिस्टीम) अंतर्गत जी (दक्षिण) विभाग कार्यालयाने पुनर्वापरक्षम जलस्रोत, जल संवर्धन, ऊर्जा बचत, शाश्वत कचरा व्यवस्थापन, आरोग्यदायी वातावरण आदी बाबींमध्ये उत्तम कामगिरी केली आहे. यामुळे आयजीबीसीने हा सन्मान केला आहे.