मंत्रालयातील आगीत संबंधित फायली नष्ट

सावरकर सदनाच्या फायली मंत्रालयातील आगीत नष्ट
सरकारची न्यायालयात माहिती

सकाळ वृत्तसेवा
मुंबई, ता. १ ः हिंदुत्ववादी विचारवंत विनायक दामोदर सावरकर यांच्या दादर येथील निवासस्थान सावरकर सदनाला राष्ट्रीय स्मारकाचा दर्जा देण्याबाबतची कागदपत्रे २०१२मध्ये मंत्रालयाला लागलेल्या आगीत नष्ट झाली, असा दावा नुकताच राज्य सरकारच्या वतीने उच्च न्यायालयात करण्यात आला.
मंत्रालयाच्या चौथ्या मजल्यावर २१ जुलै २०१२ रोजी भीषण आग लागली होती. त्या आगीमध्ये नगरविकास विभागातील या प्रकरणाशी संबंधित  सरकारी नोंदी नष्ट झाल्या. त्यामुळे या प्रकरणातील पुढील कारवाईला चाप बसला आहे, अशी माहितीही राज्य सरकारच्या वतीने न्यायालयाला देण्यात आली. या प्रकरणाशी संबंधित इतर विभाग आणि कार्यालयांशी पत्रव्यवहारासह उपलब्ध दुय्यम नोंदी आणि स्रोतांमार्फत नष्ट झालेल्या फायली आणि नोंदी शोधण्यासाठी आणि पुन्हा तयार करण्यासाठी प्रयत्न केला. तथापि, सर्व शक्य ती पावले उचलूनही संबंधित कागदपत्रे सापडली नाहीत. त्यामुळे यासंदर्भात पुढे जाण्यात अडथळा निर्माण झाल्याचे सरकारने उत्तरात म्हटले आहे. महापालिकेने सावरकरांच्या घराला वारसा दर्जा देण्यासाठी अंतिम शिफारस केली होती आणि ती राज्य सरकारच्या नगरविकास विभागाकडे पाठवली होती. आगीनंतर ३१ जुलै २०१२ रोजी महापालिकेने सार्वजनिक सूचनेद्वारे राष्ट्रीय स्मारक इमारती आणि परिसरांच्या मसुद्याच्या यादीत सुधारणा करण्याचा निर्णय घेतला, परंतु सावरकर सदनाला त्यातून वगळण्यात आले.
...
याचिका काय?
छत्रपती शिवाजी पार्क परिसरातील सावरकर सदनाची ऐतिहासिक वास्तू उभी आहे. महापालिकेने राष्ट्रीय स्मारकांच्या यादीत सावरकर सदनाच्या नावाचा समावेश करून अंतिम शिफारशीचा प्रस्ताव सरकारकडे सादर केला होता. तथापि, इमारतीचा पुनर्विकासाचा घाट घातला असून, वारसास्थळाचा दर्जा मिळण्यापूर्वी इमारत पाडली जाईल, अशी भीती याचिकाकर्ते आणि अभिनव भारत काँग्रेस या संघटनेचे अध्यक्ष पंकज फडणीस यांनी याचिकेतून व्यक्त केली आहे. तसेच, महापालिकेच्या शिफारशीनुसार सावरकर सदनाला वारसास्थळाचा दर्जा देण्याबाबत सरकारला अधिसूचना काढण्याचे आदेश देण्याची मागणी केली आहे.