१३ वर्षांपासून फरार आरोपीला नागपुरातून अटक

१३ वर्षांपासून फरार आरोपीला नागपुरातून अटक

नवी मुंबई, ता. १ (वार्ताहर) ः तब्बल १३ वर्षांपासून फरार असलेल्या रबाळे येथील खुनाच्या गुन्ह्यातील आरोपीला गुन्हे शाखेच्या मध्यवर्ती कक्षाने नागपूर येथून सापळा लावून अटक केली आहे. छोटू ऊर्फ छटू मर्कट यादव (वय ३६) असे या आरोपीचे नाव असून २०१२ साली त्याने २५ हजार रुपयांसाठी आपल्या सहकाऱ्याची हत्या केली होती. गेल्या १३ वर्षांपासून पोलिस त्याचा शोध घेत होते.
नवी मुंबई पोलिसांनी गेल्या २० वर्षांतील प्रलंबित खुनाचे गुन्हे उघडकीस आणण्यासाठी विशेष मोहीम सुरू केली आहे. त्याचाच भाग म्हणून गुन्हे शाखेकडून प्रलंबित खुनाच्या गुह्यांचा तपास करण्यात येत आहे. त्यानुसार पोलिसांनी १५ ऑक्टोबर २०१२ रोजी रबाळे एमआयडीसी परिसरात घडलेल्या भावनखन उगन यादव (वय ५०) यांच्या हत्या प्रकरणाशी संबंधित सर्व कागदपत्रे प्राप्त करून आरोपीची सखोल माहिती मिळवली. या गुन्ह्याच्या तांत्रिक विश्लेषणात आरोपी छोटू ऊर्फ छटू मर्कट यादव हा नागपूर शहरात वास्तव्यास असल्याचे आढळून आले. त्यानुसार पोलिसांनी नागपूरमध्ये सापळा रचून त्‍याला अटक केली.

भावनखन उगन यादव याने आरोपी छोटू ऊर्फ छटू मर्कट यादव याच्याकडून २५ हजार रुपये उसने घेतले होते; मात्र भावनखन हा उसने घेतलेले पैसे परत देण्यास टाळाटाळ करीत होता. त्यामुळे आरोपी छोटू याने रागाच्या भरात भावनखन याच्या छातीवर धारदार शस्त्राने हल्ला करून त्याची हत्या करून पलायन केले होते. त्यानंतर आरोपी न सापडल्याने हा गुन्हा अ वर्ग समरी म्हणून न्यायालयात दाखल करण्यात आला होता.