मुंबई महापालिका देणार मूर्तिकारांना मोफत रंग

मुंबई महापालिका देणार
मूर्तिकारांना मोफत रंग
जलप्रदूषण रोखण्यासाठी पालिकेचे पाऊल
सकाळ वृत्तसेवा
मुंबई, ता. १ : पर्यावरणपूरक गणेशोत्सव साजरा करण्यासाठी महापालिकेकडून मूर्तिकारांना मोफत शाडूची माती, गणेश कार्यशाळेच्या मंडपासाठी जागा अशा सुविधा उपलब्ध करण्यात येते. आता मूर्तिकारांना मोफत पर्यावरणपूरक रंग पालिकेच्या वतीने पुरवण्यात येणार आहेत.
सहा पर्यावरणपूरक रंगांचा यात समावेश आहे. यात सात हजार ८०० लिटर रंग आणि तीन हजार लिटर इको प्रायमर पुरविण्यात येणार आहे. मूर्तिकारांनी या रंगांचा वापर करून गणेशमूर्ती रंगवाव्यात, असे आवाहन पालिकेने केले आहे. जलप्रदूषण कमी करणे हा त्यामागे उद्देश असल्याचे पालिकेने म्हटले आहे.
गणेशोत्सव साजरा करण्यासाठी महापालिकेकडून सेवासुविधा पुरवण्याची कार्यवाही केली जात आहे. पालिका आयुक्त भूषण गगराणी यांच्या निर्देशानुसार प्रशासनाकडून निरनिराळ्या नागरी सेवासुविधा पुरविल्या जात आहेत. मुंबई महानगरात शाडू मातीच्या मूर्ती घडविण्यासाठी प्रोत्साहन मिळावे, जास्तीत जास्त पर्यावरणपूरक मूर्तींची प्रतिष्ठापणा व्हावी, यासाठी पालिकेकडून मूर्तिकारांना दरवर्षीप्रमाणे यंदा मोफत शाडू माती पुरविण्यात आली आहे.

मूर्ती रंगविण्यासाठी वापरले जाणारे रासायनिक रंग हे पर्यावरणासाठी घातक ठरू शकतात. त्यामुळे विसर्जनावेळी जलस्रोतांचे प्रदूषण होऊन सार्वजनिक आरोग्यावर विपरीत परिणाम होऊ शकतो. या शक्यता गृहीत धरून महापालिकेने मूर्तिकारांना शक्य तितक्या पर्यावरणपूरक रंगांचा वापर करावा आणि जलाशयांचे प्रदूषण टाळावे. तसेच यासाठी प्रशासकीय विभाग कार्यालयात संपर्क साधण्याचे आवाहन केले आहे.
...........
प्रायोगिक तत्त्वावर उपक्रम
- मूर्तिकारांना मूर्ती रंगविण्यासाठी प्रायोगिक तत्त्वावर पर्यावरणपूरक रंग देण्यात येणार आहेत. पांढरा, नारंगी, पिवळा, हिरवा, निळा आणि लाल या रंगांचा समावेश आहे.
- इतर रंगांच्या तुलनेत पांढरा रंग मोठ्या प्रमाणात पुरविण्यात येणार आहे. पर्यावरणपूरक पांढरा प्रायमरही देण्यात येणार आहे.
-------------
मूर्तिकारांना मिळणाऱ्या सुविधा
- सात हजार ८०० लिटर रंग
- तीन हजार लिटर इको प्रायमर
- ९५२ टन मातीचे मोफत वितरण
- ९९७ मूर्तिकारांना मंडपासाठी जागा

.........