९८ टक्के बेस्ट कर्मचा-यांचा संपाच्या बाजून कौल

बेस्ट कर्मचाऱ्यांचा संपाच्या बाजूने कौल!
अंतिम निर्णय गुरुवारी पदाधिकाऱ्यांच्या बैठकीत
सकाळ वृत्तसेवा
मुंबई, ता. १ : ‘समान कामाला समान वेतन’ या मागणीसाठी बेस्ट उपक्रमातील खासगी कंत्राटी कर्मचाऱ्यांनी आता संपाचा इशारा दिला आहे. या पार्श्वभूमीवर संघर्ष कामगार कर्मचारी युनियनच्या नेतृत्वाखाली १६ आगारांमध्ये तीन टप्प्यांत घेतलेल्या मतदानात तब्बल ९८ टक्के कामगारांनी संपाच्या बाजूने कौल दिला आहे. ५,०५१ कर्मचाऱ्यांनी मतदान केले असून, त्यापैकी ४,९८६ कामगारांनी संपास पाठिंबा दिला आहे. संप होणार की नाही याबाबतचा अंतिम निर्णय येत्या गुरुवारी (ता. ७) पदाधिकाऱ्यांच्या बैठकीत घेतला जाणार असल्याची माहिती युनियनचे सरचिटणीस शशांक राव यांनी दिली.
बेस्ट उपक्रमात कंत्राटी पद्धतीने काम करणारे कामगारही कायम कर्मचाऱ्यांप्रमाणेच वर्षभर बस चालवण्याचे काम करतात, मात्र त्यांना कायम कर्मचाऱ्यांसारखे वेतन आणि सेवा सुविधा मिळत नाहीत. त्यामुळे गेल्या अनेक वर्षांपासून ‘समान कामाला समान वेतन’ या तत्त्वानुसार वेतनमान लागू करण्याची मागणी सुरू आहे; मात्र प्रशासनाच्या दुर्लक्षामुळे संपाचा मार्ग स्वीकारण्याशिवाय पर्याय उरलेला नाही, असे संघटनेकडून सांगण्यात आले. दरम्यान, बेस्ट प्रशासनाने लवकर निर्णय न घेतल्यास मुंबईतील सार्वजनिक वाहतूक व्यवस्थेवर परिणाम होऊ शकतो, असा इशाराही संघटनेकडून देण्यात आला आहे.
..............
सर्व आगारांमध्ये झाले मतदान
संपाच्या बाजूने : ४,९८६
संप नको : ७
बाद मते : ५८