काशिद समुद्रकिनारी आढळले ५५ लाखांचे चरस

काशिद समुद्रकिनारी आढळले ५५ लाखांचे चरस

मुरूड, ता. १ (बातमीदार) : काशिद समुद्रकिनारी ५५ लाख ७४ हजार रुपये किमतीचे ११.१४८ किलो वजनाचे चरस सापडल्याने खळबळ उडाली आहे. याप्रकरणी मुरूड पोलिस ठाण्यात गुन्हा दाखल करण्यात आला आहे. काशिद समुद्रकिनाऱ्यावर गुरुवारी (ता. ३१) सायंकाळी साडेपाच वाजण्याच्या सुमारास मुरूड पोलिसांना संशयास्पद प्लॅस्टिक गोणी असल्याची माहिती मिळाली. पोलिसांनी घटनास्थळी धाव घेत या प्लॅस्टिक गोणीची तपासणी केली असता त्यामध्ये चरससदृश अमली पदार्थ आढळून आला. पंचनामा करून पोलिसांनी हा अमली पदार्थ जप्त केला असून त्याचे एकूण वजन ११.१४८ किलो असून त्याची किंमत ५५,७४,००० रुपये आहे. याप्रकरणी मुरूड पोलिस ठाण्यात गुन्हा दाखल करण्यात आला असून पोलिस या प्रकरणाचा अधिक तपास करीत आहेत.